鄭裕玲幫劉嘉玲翻三十年冤案 拖埋周海媚落水:佢先系遲嗰個

撰文:冼燕珊
出版:更新:
鄭裕玲(Do姐)邀請咗劉嘉玲上電台節目,兩位阿姐好耐無見,喺節目上大爆當年情,Do姐大嘉玲8年,亦比佢早8年入行,嘉玲話初入行時,Do姐已經系阿姐級:「Do姐系前輩嚟,佢一入化妝間啲化妝師就叫我哋起身,讓位俾Do姐坐。」Do姐聞言大笑話唔知有啲咁嘅事,仲話自己不知幾和藹可親,不過嘉玲就話:「你嗰時真繫好惡㗎。」

講講嚇佢哋就講返起坊間流傳咗好耐有關佢哋兩個不和嘅傳聞:「有件事真系要澄清嚇,記得嗰陣拍緊《流氓大亨》,有日有人遲大到,咁我見人遲到會好忟,我就問嘉玲系咪佢遲到,但遲到嗰個唔系佢,傳傳嚇就變咗我鬧佢遲到,直至早幾年《康熙來了》仲問緊嘉玲呢件事,但遲到嗰個唔系嘉玲。」《流氓大亨》於1986年首播,咁呢單32年嘅冤案,究竟邊個先系遲到嘅主角呢?
雖然事隔咁多年,但嘉玲就記得當時邊個遲到:「遲到嗰個系周海媚,佢遲咗兩個鍾,你當時就行埋去問佢:『點解你要遲到,我依家去飲茶,你慢慢化妝先。』」Do姐就話自己一啲印象都無,同埋可能Do姐依家睇嘢好淡,呢件事又過咗咁耐,佢打圓場笑住話:「都唔知系咪你(劉嘉玲)記錯,無啦啦拖埋周海媚落水。」
+3