【無間道】朱鑑然細個時係百厭仔 去拜年被親戚𥄫到實

農曆新年將至，又係時候買定禮盒糖果準備去親戚朋友屋企拜年。近日有網民就熱烈討論過年時所遇過的麻煩親戚，話親戚小朋友來拜年時常會搞亂檔，例如擅自衝入房拿玩具玩，開電腦或遊戲機玩，甚至有些網民話阿媽會送晒自己的玩具、遊戲機畀親戚，提醒大家要小心提防。朱鑑然 (Kevin) 今日出席劇集《無間道》活動時，問到他可有遇過甚麼麻煩親戚，他即笑謂：「又無喎，因為我就係嗰個麻煩親戚，我就係要畀人處處提防嗰個，哈哈。」

咁究竟Kevin細個去親戚屋企拜年時有幾百厭呢？他說：「都係通屋跑，走嚟走去會整跌啲嘢，食晒人哋啲糖果。都會有親戚唔畀我入佢哋間房，同我講話朱仔呢間房唔可以入㗎，有啲間屋大嘅，直情喺樓梯位置已經封住咗，唔畀我上去。不過我又唔會亂拎人哋啲玩具玩，我會自備玩具帶去玩嘅。」Kevin直認細個時都幾曳，試過在家中玩彈珠人射爆了花樽，弄到成個窗台都是水。

向來有健身操肌的Kevin雖然好注重自己的身形，但過年時都會應節食下賀年食品：「蘿蔔糕、年糕呢啲唔少得，因為之前戒口戒得太勁，幾乎戒晒澱粉質，搞到個人有啲moody，新年要食返多啲嘢，但又唔會狂食嘅，都會有節制咁食。過年都會同屋企人賭下錢，玩下魚蝦蟹、鬥地主同射龍門。」