【公子會】林泳淘原來拍拖11年　主動出撃追男友：見佢怕羞好得意

憑住TVB旅遊節目《三日兩夜》而廣為人知的林泳淘，是不少宅男心目中的女神，不過看來男士們要心碎了！就是女神原來有個拍了拖11年的男朋友！更是女方主動出撃追求對方！讓人大呼：「這些機會不是我的！」

話說林泳淘在森美深夜節目《公子會》做嘉賓，起初她與主持森美、火火及Sunny講起之前拍《三日兩夜》的性感場面，當問到節目在海灘遊玩、要著泳衣會否惹來他人呷醋？林泳淘開始支支吾吾，經主持人逼供之下，她才說：「咁又冇介意嘅…不過佢未見過我著泳衣個樣…」後來主持人再問：「而家有冇？又係唔係當時嗰個？」林泳淘起初默不出聲，但她的身體語言、面部表情都瞞不過幾位主持人…最後她默認了，更自爆：「拍咗11年。」讓幾位主持人大吃一驚，而且還有點失望，因為女神一早封盤了。

林泳淘坦言過往好多人追，但係沒有真正接受其他人要求，所以現任男友算是初戀男友。後來森美追問她相戀過程，林泳淘自爆是主動出撃，指男方是同學的同學：「當時係聖誕party，見到佢好似好怕羞，又唔係好出聲，又唔係好敢望啲女仔，就覺得佢幾得意，於是走過去撩佢講嘢。」這個舉動即被主持笑指是「蜘蛛精」，林泳淘笑言：「我講啲嘢冇暗示㗎…之後大家曖昧咗一年有多，然後中間嗌咗交，佢再調返轉頭追我，之後就一齊咗。」

林泳淘好欣賞對方的好脾氣：「就算我發嬲，佢都會好冷靜問我做咩事…過去又唔會點嗌交。」而11年來，彼此之間都有做甜蜜舉動保溫，就算林泳淘工作好忙，男友都會好想見面。而11年來，兩人都沒有同居，林泳淘說：「因為我屋企人比較傳統，所以都冇同居。」不過她暫時沒有結婚打算。

林泳淘坦言身邊有不少條件較好的男生出現，有時忍不住向男方呻：「唉～你知唔知我為你放棄咗好多嘢！」然後男方原來都感受到：「我知呀！每次你講『唉！』，都知道你身邊有比我好嘅人出現。」更說：「如果身邊有好過我嘅人出現嘅話，你選擇咗佢我都唔會怪你。」真係好理性，而主持人聽到之後講笑對住林泳淘講：「我覺得你男友好好，但你唔好！」

不過，林泳淘透露剛一起時，發現男友有追求者，而且來往甚密，雖然男方不介意讓林泳淘看他的訊息，但事情讓林泳淘崩潰，更嚇壞了男友。幸好自此之後，促成兩人坦誠相對：「以後有咩事都會攤出嚟講。」睇嚟林泳淘真係好幸福。