【早霸王】女友嗌分手挽留失敗 森美一語中的： 要知自己錯咩！
每逢一到星期五這個日子，就知道係《早霸王》表白環節《你知道唔知道有人掛住你》的時候，今日有個男聽眾叫做「阿豪」，今次佢打上嚟就係想同女友箍煲嘅，森美即時就叫佢唔好講咁多嘢，直接入正題：「你唔好講其他啦，你激嬲佢啲咩嘢先，咩事要箍煲，你做錯咩事？」阿豪就口窒窒咁話成搞到女友唔開心，但分手總有導火線，到底係咩事呢？阿豪就諗返起：「應該係今年年尾同佢去旅行，咁夜晚同佢瞓，我鼻鼾太大佢瞓訓唔到，我唔知係鬧佢定摑佢，之後佢就冇同我講過野喇。」
【早霸王】男仔成日被嫌幼稚唔成熟 森美教路：有計劃要講佢聽！
鬧女朋友同摑女朋友分別好大喎，究竟阿豪係做咗邊樣啊？「我冇問過佢啊， 唔敢問，有時做錯嘢都唔敢同佢講對唔住，佢真係咁樣都忍左我幾年。佢之後同我出多次街，跟住就冷戰到Message都冇喇，直到上星期一同我講分手，我都有Message同佢講祝佢幸福。」相信大家同森美一樣都唔明點解阿豪唔道歉呢？阿豪就話同女友由2014年拍拖，都拍咗3年幾，算係唔短嘅日子，但阿豪就對自己好冇信心：「祝佢幸福，因為我覺得自己唔可以帶俾佢未來。」
做男人最忌冇自信，森美即刻喝停佢：「你穿越嚟架？有明天你就有未來架啦， 點解你睇低自己啊？有冇未來你要自己諗，你要定目標畀自己，有邊個定到目標就一定做到？冇信心令女仔要分手你唔敢挽回，摑佢一巴你都唔敢道歉！」
阿豪聽完都仲係好自卑，佢形容如果100分係滿分，自己連10分都冇，森美就安慰佢：「你7分都係進步，係你SET得個目標太高，太心急容易放棄，就會覺得自己冇用，你想追返人肯定要改變，起碼女朋友最唔鍾意你果幾樣嘢你要改，你唔知自己錯咩，改唔到就永遠都錯！」
森美都講到咁明，阿豪都有小小開竅：「最簡單就係睇醫生 幫我解決鼻鼾，仲有就係買唔到樓，上唔到樓。仲有其實我做藥房最好就讀返個Degree，我依家都係個High dip仔嚟，之前我話冇錢就冇報，但依家就儲咗少少錢，打算再讀。」森美糾正阿豪負面思想：「唔係一定要買樓嘅，唔係買樓先代表上進，我好多朋友就算有錢都未必買樓，個腦唔好淨係放層樓喺度，有啲嘢你可能覺得自己未必做到，但過程好重要！」最後森美就幫阿豪打畀前女友恩詠，阿豪跟足晒Step去承諾女友會改過，會睇醫生會讀書，誠懇到森美聽到都眼濕濕，恩詠就婉拒話：「你畀啲時間我啦。」，可惜感情呢家嘢，過咗「修補期」就好難再回到過去。