【平安谷】劇本受到港女啟發　編審湯健萍：女人要珍惜權利

今晚將會播出大結局的TVB劇集《平安谷之詭谷傳說》，第一集播出陳瀅要被殉葬，有不少觀眾都以為TVB新年流流播「鬼片」，又以為又一套「炮灰劇」。點知原來係講女權主義，吸引不少女觀眾收看，仲評價非常好。編審湯健萍接受《香港01》訪問時就透露了當初為什麼會撰寫該劇本，原來係關「港女」事，「而家有好多人都講香港嘅女仔好大女人主義，乜都係自己話晒事好有power，仲衍生埋有港女呢個字出現，所以就想寫一套關於女人嘅劇。」

相關文章：

【平安谷】大結局衰人全部死哂　女村民將女誡碑打碎真係super

湯健萍指因為TVB講女權劇集做題材都比較少，所以開始構思今次的劇本，「女人有今日嘅自由同權利，都要多得舊時代嘅女人，尤其是民初時代新舊文化交替嘅時候，當時的女人們才醒覺其實自己都該有嘅權利，並唔係只有男人才有自由同權利。」她其後續道，指現在社會上有好多職位例如特首或局長，都是由女士擔任，所以要感激舊時代所爭取的東西，因為得來不易，所以希望現今的女士們就應該更珍惜。

提到劇中有好多事件發生，例如殉葬，《女誡》等，原來在現實生活曾經發生過，湯健萍表示一班編劇在撰寫劇本前都參考很多文學資料，「因為劇情時間發生在民初，所以都有花一段時間去搜集資料。其實魯迅嘅短篇小說《祝福》中入面嘅祥林嫂，裏面就正正講出了封建社會當時對女人地位係好卑微。」至於成績咁好，會否有機會開拍第二輯？她表示要睇公司安排，而且現在第一輯剛播出大結局，一切還處於初步階段。