張曦雯攞正牌着泳衣　只因麥玲玲贈兩句「着少啲衫會更好運」

近日在TVB節目《3日2夜》中又騷身材嘅張曦雯再度被網友高度關注，貴為新一代女神嘅佢當然要密密搵真銀喇！今日Kelly就與麥玲玲一齊於上環出席活動期間，就被玲玲師傅贈兩句，指Kelly今年如果可以著少啲衫會更好運。Kelly其後接受《香港01》訪問時被問到會唔會，她就笑言，「都無話性唔性感，玲玲師傅都講得好啱，佢叫我要近水多啲，去多啲沙灘著少布啲咁，我都會聽佢話嘅！」相信唔止電視機前嘅觀眾有眼福，而係去沙灘嘅人都有！

提到節目出街時，大部分觀眾都係睇Kelly嘅身材多次睇節目內容，佢聞言即刻話，「唔係喇！好多人同我講睇得好興奮，見到我玩得好開心，佢地咁我都好滿足！」至於今次到澳洲黃金海岸拍攝《3日2夜》時，有無好似上次去毛里裘斯咁識到當地嘅男仔，Kelly即刻好灰咁講，「次次導演都同我講會有好似brad pitt嘅人同我去旅行，但都係呃我，最後得返拍攝crew嘅人！」她指因為今次行程實在太趕，私底下都好攰又要玩又要食，所以無心情去識異性。

問到昨天是好姊妹蔡思貝生日，Kelly就指今個星期六會同對方補足生日，被問到會否趁機介紹男仔俾對方認識下，Kelly即刻耍手話，「佢唔洗啦！因為好多人都想識佢！」咁又係，佢地都咁靚女，想識佢地嘅人真係由電視城排到尖沙嘴呀！