簡淑兒爸爸管教極嚴　細個唔俾拍拖只可去圖書館

宅男女神簡淑兒（Jessica）於TVB劇集《平安谷之詭谷傳說》中，飾演醫生賈東陽（鄭子誠飾）的女兒淼淼，她在之後的劇情中，將會跟周學文（謝東閔飾）私奔，逃離平安谷，但原來在現實中，Jessica也曾被家人阻撓她拍拖。

今日Jessica出席 TVB劇集《波士早晨》宣傳，佢接受香港01訪問時話，雖然佢在美國長大，但家人對她管教甚嚴：「由細到大，家人都對我好嚴謹，除咗圖書館，其他地方都唔准去，唔可以去公園，唔可以去朋友屋企。」不過管得愈嚴，子女反抗得愈厲害，Jessica都唔例外:「我當時比較反叛，會講大話呃屋企人話去圖書館，但其實去公園同朋友屋企。」不過知女莫若父，Jessica爸爸試過因為唔放心，偷偷地跟蹤佢：「佢仲要跟完返到屋企先鬧我。」

Jessica爸爸唔只唔准佢去街，連佢啲衣著都干涉，裙太短同布太少都唔得，Jessica細個時一直都係短髮，青春期開始留長頭髮，而且注重打扮，一度令爸爸非常擔心，以為有男仔追佢，唔通每個父親都有呢啲其通點？

其實Jessica爸爸之所以對佢咁嚴厲，都只係出自關心，Jessica話:「雖然爸爸對我哋好嚴，不過佢對我哋好好，非常愛鍚我哋。」而最搞笑的是，Jessica爸爸喺佢細個時就擔心佢拍拖，到佢大學一畢業，就催佢快啲有拖拍，最好即刻結婚添，Jessica笑言依家都會氹住爸爸:「搵緊㗎喇!」