【港女講感情】平安谷女人嫁邊個冇得揀　現代就有男朋友都難結婚

近排大台新劇《平安谷之詭谷傳說》一反常態，唔玩女人鬧交爭家產，或者警匪追捕講古惑仔，今次竟然開新Chapter講女權，故事講喺民初一條村落，嗰時仲係父權主義，男人可以將女人當係貨物咁，係男人嘅附屬品，盲婚啞嫁係基本嘢，老公死咗個老婆仲要跟埋一齊去殉葬，相信各位姊妹睇完都無名火起。

【港女講感情】阿嬌鍾欣潼認愛賴弘國　有錢有樣邊使人「埋單」？

【港女講感情】旅行青蛙點解咁受歡迎　青蛙唔受控制最中女人心理

套劇入面除咗陳凱琳之外，個個女人嘅老公都超大男人主義，當女人係工人或者係奴隸，煮飯湊仔劈柴擔水，仲慘過返咗北韓。最SAD嘅身邊嘅老公個個都係超大年紀阿叔，個個都把口又衰，當老婆係妹仔咁使，就算大住肚都要攀山涉水去擔水，劇中喺《開心速遞》做大小姐嘅林淑敏做立秋嫂，小產完冇人關心，仲要被老公鬧抵死。劇入面大家都冇得揀自己老公，所以蘇玉華錯過初戀情人，下嫁最大粒嘅村長谷爺劉江，龔嘉欣本身係妹仔嚟，但都被劉江睇中做四奶，平安谷對於女人嚟講簡直係惡夢。

但今時今日就算戀愛自由，你鍾意邊個同邊個結婚都唔係咁爽YY。而家好多人都中學甚至小學已經拍拖，女仔唔再係被迫去結婚，甚至多選擇到可以收兵做娘娘。不過，喺「睇樣」嘅社會裡，你的樣子如何，你的日子也必如何，女神真係唔係個個做到，平凡像我路過十個似我嘅大家都係正常拍吓拖咁。

但喺2018年，雖然話拍拖係可以拍拖，但話結婚就真係唔係咁容易，先唔係影結婚相擺酒過大禮要使幾十萬，一個家最重要有自己個竇，但今日睇新聞荃灣新樓一房單位竟然炒到要成千萬都仲有人買，年輕人上樓冇望仲結咩婚。退而求其次諗租樓，市區求其租間都要萬幾蚊，租金夠你個個月去到一轉日本，想結婚生仔真係唔係咁易，冇錢冇樓，隨時仲慘過盲婚啞嫁。唔係唔想結婚，係唔敢結婚，無謂害咗對方，危害下一代。