【中華小姐】游生做司儀受寵若驚　「冇諗過做咁有國際性嘅show」

出名講波出色嘅游生袁文傑，最近做埋司儀呢瓣！一嚟就做大show《2018國際中華小姐競選》。游生勁開心咁話：「冇諗過嚟到咁快就可以做一個咁有國際性嘅節目喇，咁可能因為我之前都有相關嘅經驗喇，所以今次就有呢個機會。」話就話係國際性，不過游生半點緊張都冇，果然見慣大場面呀！

半講波形式做司儀
比起講波，游生話做司儀唔同嘅就係要記稿，而佢今次就話會以半講波形式咁樣做司儀，但詳情係點，佢話睇完先知。不過游生就點評今年佳麗：「坦白講有大部分嘅佳麗質素都好高，從佢哋嘅談吐呀、舉止動作睇得到佢哋係好高質素。」游生點樣好似講波咁講女呢？佢就會留返節目都畀大家睇喇。