48歲譚耀文愈來愈有男人味　內地拍劇病咗無醫生睇

譚耀文今日著起一身軍裝，現身新蒲崗，同林峯、蔡卓妍及方中信同場，拍攝英皇網劇《PTU機動部隊》，他在劇中飾演高級督察，阿譚今年48歲，多咗幾條魚尾紋，男人味湧晒出嚟，拍住出晒名嘅型佬方中信，都沒有被比下去。

阿譚話去年係豐收的一年，做完《風雲5D音樂劇》之後非常忙碌，電影一部接一部，他說每個月都有新戲開，成日中港兩邊走，究竟在內地工作同香港拍戲有咩唔同，阿譚就話：「喺香港方便好多，放工可以返屋企，有太太照顧，有湯水同住家飯食，病咗又可以搵睇開嘅家庭醫生。喺內地拍劇病咗無醫生睇係經常發生嘅事。」咁點算呀？「劇組啲同事好好，我每次病咗，就會有好多人關心我，俾藥我食，先可以頂住先。」