【旅行青蛙】山寨版養蛙變芒亨勁崩潰　趕潮流下載發覺中伏

「你隻仔返屋企未呀？」「今日儲到幾多塊葉？」，呢幾日辦公室充斥住互相問候嘅語句，女同事個個變晒慈母一樣，日盼夜盼阿仔幾時返歸。佢地其實只係玩緊最緊Hit爆嘅日本手機遊戲《旅行青蛙》（旅かえる），呢隻Game好就好在其實唔使點玩，唔會花太多時間，令到男同事們R晒頭唔明白點解會沉默，默默走去下載試玩，點知，就中伏啦﹗

由於《旅行青蛙》（旅かえる）暫時只得日文版，唔識睇嘅朋友仔除咗睇攻略，都係得閒去APP STORE睇下官方幾時出中文版。有男同事下載完之後話：「有得打下怪物都幾好玩呀﹗好似芒亨呀。」打怪物？芒亨？下？望一望佢嘅版面先發覺，原來下載咗山寨版青蛙。

正版青蛙被稱為「佛系放置Game」，因為玩家喺遊戲中只有四樣野可以做：為青蛙執拾行裝，放置桌面、收割三葉草（可換取青蛙旅行所需的食物和道具）和招待青蛙嘅朋友。不過呢隻山寨版《旅行蛙の青蛙旅行家》，除咗icon都係一隻青蛙，個名又好似之外，玩法完全係南轅北轍。

正版並不含競技、任務和互動成分，只要等時間過去收割三葉草，幫青蛙準備食物同道具就可以，而山寨版要不斷屠龍賺取四葉草，成件事真係血腥兼忙得多；另外介面上兩款都相當似，未使屠龍之前真係好易被騙，不過大家只要認住日文先啱，事關官方未有中文版推出，簡體字就一定係山寨版嚟架啦。