【港女講感情】旅行青蛙點解咁受歡迎　青蛙唔受控制最中女人心理

近期日本手機Game《旅行青蛙》勁hit，個個都拎住部電話話要等個囝返屋企，唔係就問個囝幾時出街，未玩過隻game嘅大家可能一頭霧水，尤其係平時玩開《絕地求生》（PUBG）食雞，又或者Monster Hunter屠龍嘅巴打，唔知仲以為女朋友成日拎住部電話，好似「我的港女老婆」咁偷食。

【旅行青蛙】許茹芸《寄信人》中文版MV出爐　 聽住嚟玩超有FEEL

【旅行青蛙】五月天阿信、Selina@S.H.E齊深陷　當正係自己仔咁養

其實《旅行青蛙》就唔係咩咁厲害嘅game，就類似Tamagotchi咁嘅育成遊戲，即係養青蛙，聽落好似無無聊聊咁，有咩咁好玩啊？佢巧妙之處，就係隻青蛙仔唔會受你控制，你雖然可以幫佢改名，但你唔可以指示佢去做嘢，所以最吊大家癮就係你唔知佢幾時躝街去旅行，又唔知佢幾時先去完旅行返屋企，呢種捉摸唔到嘅感覺就最令大家「囉囉攣」，只可以時不時拎部電話禁入Game睇吓阿囝喺唔喺屋企，完全好似未拍拖嗰陣同對方估估吓嘅感覺。

女仔就最鍾意呢種錯摸心理嘅feel，即係好似觀音兵點解做極都係兵，而MK仔就咁易食到女神，除咗係因為「你的樣子如何，你的日子也必如何」之外，最重要就係通常兵都係隨傳隨到，叫你做乜就做乜，都冇咩挑戰性，畀人感覺奴性好重，唔使你做嘢仲搵邊個。而MK仔行事我行我素，永遠都估佢唔到，就係咁有個性先吸引到女神注意，就好似青蛙仔咁，你想佢返屋企佢又唔係到，你唔想佢成日留喺屋企，佢又仲坐喺度食早餐，咁有自己Style就正中各位姊妹下懷喇，抵《旅行青蛙》咁成功嘅！