【西遊記女兒國】梁詠琪為霸氣僭建額頭　半禿冇所謂：辛苦但值得

家傳戶曉的《西遊記》曾多次被拍攝成劇集及電影，絕對可能用長拍長有來形容。由鄭保瑞打造的《西遊記》亦不知不覺去到第3集，最新一集《西遊記女兒國》除鐵腳郭富城、馮紹峰、小沈陽、羅仲謙之外，今次更找來梁詠琪（Gigi）、林志玲同趙麗穎。
曾在戲中裝胸作勢、酗酒素顏的Gigi，今次為了國師一角，連半禿頭都試埋，囡囡Sofia見到都不禁擰頭問聲小姐你邊位。

梁詠琪過往的電影角色都比較生活化，首次飾演國師講求霸氣，即係郁吓手指尾都可以鎮壓全場嗰隻。「我呢個角色一定要精準同簡而有力，雖說要用最簡單的動作去hold住全場，但往往一個小動作就會變成多咗，導演在這方面幫我調整了很多。」要霸氣但又唔可以係惡，想用眼神但卻發不出力，因為僭建的大額頭、同兩撇假眼眉將所有表情鎖死。「其實特技化妝、加埋皇冠以及服飾令成件事出來已經喺度，導演將我髮線向後移，額頭誇張化，每日單係化妝用上5小時，而為了確保皮膚無事，化妝師又會用1小時幫我落妝。」換言之，如果收到早上八點的通告，梁詠琪要在零晨三點起身化妝。「過程係辛苦，但每樣都值得，雖然瞓少一半，但總有方法令件事開心一點地發生。就好似去諗吓拍埋今日又少一日，就快可以返屋企。」
 

禿頭未算最勁

梁詠琪由出道至今演出多部電影，造型上不時有驚喜：由《百變星君》的醜小鴨「蟲蟲」、《嚦咕嚦咕新年財》的無牌品潑婦到《骨妹》的酗酒素顏，可見Gigi拍電影可以去到相當盡。問到假如將來遇上一個角色有很好的發揮，但需要蒙面只能露出眼睛，Gigi沒有多想說了一聲願意。「呢個應該係最高境界，哈哈！其實我向來在電影造型都沒有包袱，或者是因為覺得經過鏡頭之後已隔了一層，所以我會在意台上唱歌、活動，想以最靚一面示人，拍戲真的無所謂，最緊要信任你的團隊。」Gigi說有將自己的國師造型給囡囡看，更問她知否相中人是誰，3歲多的Sofia當然猜不出，一直擰頭，非常好笑。

唔捨得都無辨法

《西遊記女兒國》先後在無錫、台東取景，Gigi也為此「拋夫棄女」一個月。「都係一個月啫，有時見唔到都好，可以專心點去拍戲，返酒店有更充分的休息，當放假也好。」聽落輕鬆，但其實Gigi拍攝期間也趁空檔回港，每日收工返到酒店也會facetime，試過聽著老公「匯報」囡囡一舉一動時，眼淚不自覺流出。「好心痛我只能夠聽佢今日做乜，而唔可以親眼睇，所以之後拍戲都想盡量在香港，如果要走三個月可能真係無辦法。」不過，接下來半年Gigi要離港也難，與鄭秀文合作的《八個女人一台戲》拍攝得如火如荼，5月再戰紅館。月初進行這個訪問時，Gigi仍未落實得到紅館的檔期，個唱《梁詠琪好時辰世界巡迴演唱會》去年在世界各地舉行，偏偏沒有香港份。「一直都話無期，又確實唔係你話有就有，現在是平常心。」

Make up:Circle Cheung(ndnco.co)
Hair:Sam Lo @pi4.com.hk
服裝：Ports 1961
場地：帝樂文娜公館DaDa Bar