【永遠懷念．有片】鄧麗君65歲冥壽　Google Doodle貼圖紀念

今日大家上網打開瀏覽器時，會見到Google首頁換上一張紫色基調嘅圖畫，畫中有一個著住白色裙頭戴花環，拎住咪嘅女仔，於月光下正在高歌，就好似唱緊《月亮代表我的心》。Google doodle以呢一幅圖，紀念一代華語歌后鄧麗君65歲冥壽。

鄧麗君1953年於台灣雲林縣出生，本名鄧麗筠，國語讀音本來讀「雲」，但家人與鄰居將「筠」字發「均」音（與「君」同音），故鄧麗君就成為她日後投身歌唱事業藝名。1964年，年僅11歲嘅鄧麗君，參加中華廣播電台舉辦嘅黃梅調歌唱比賽，以一曲《訪英台》奪得冠軍；1967年，鄧麗君選擇休學展開歌唱事業，加盟宇宙唱片，發行個人第一張專輯《鄧麗君之歌第一集·鳳陽花鼓》一炮而紅。

1974年，鄧麗君於媽媽陪同下前往日本發展，並取藝名為テレサ・テン（音譯自Teresa Teng），同年7月1日，發行嘅第二張日語單曲《空港》，一個月內以70萬餘張總銷量，進入全日本流行榜前15名，更榮獲日本唱片大獎新人獎。1976年，於香港利舞台舉行首次個人演唱會，兩日三場門票旋即銷售一空，並有「亞洲歌姬」美譽。

喺長達30年嘅演藝生涯中，鄧麗君歌影視三棲發展，以歌唱方面成就特別卓越，又因父親是中華民國國軍，鄧麗君畢生致力慰問國軍官兵，故又有「軍中情人」之稱。1995年5月8日，鄧麗君因氣喘發作猝逝於泰國清邁，享年42歲。

雖然鄧麗君已經逝世近23年，但佢嘅歌聲依舊永遠喺歌迷心中，每年冥壽及死忌都有大批支持者，到佢嘅墓地或故居獻花致意。最近傳出3月將會開拍電視劇《鄧麗君》，講述一代歌后嘅一生，並由陳妍希擔崗演出女主角，早前佢現身活動時都有透露，於家中勤於練唱，希望可以演得形神俱備。