莊思明平鞋襯長腿 貼地拿督女：30蚊我都會買
撰文：冼燕珊
出版：更新：
莊思明今日出席活動，著咗條黑色連身短裙，配襯一對閃鑽高踭鞋，騷出一雙42吋長腿，靚到在場人士嘩嘩聲。對鞋咁靚，以為一定好貴啦，但思明就話對鞋係網購嘅，而且只係幾百蚊港紙，真係完全睇唔出:「其實我唔係好捨得使好多錢喺一件物品上，如果我喺街見到一對耳環我覺得靚嘅，只係值30蚊我都會買。」估唔到思明雖然貴為拿督女，生活會咁貼地。
思明話男朋友楊明同佢一樣都係咁慳，從來都唔會買名牌袋俾佢:「佢唔明點解啲女仔買個幾萬蚊嘅袋但用幾次就唔再用。」但思明話楊明對自己嘅好勝於送佢名牌手袋:「例如我前一晚講話想食咩，佢第二日就會買俾我食，而且佢仲會愛屋及烏，買多啲，俾埋我家姐（莊思敏）食。」
兩口子真係好恩愛，羨煞旁人，好似楊明早前喺《萬千星輝頒獎禮2017》獲飛躍進步男藝員獎，思明專程走去買佢最鐘意食嘅果檔嘅魚蛋燒賣同佢慶功，已經氹得佢好開心。兩個真心相愛嘅人唔需要太多物質來證明，而是你說過的話，喜愛的東西，對方都放在心上。