范冰冰細佬愛炫耀巨星家姐　范丞丞試過亂公開電話

有個巨星做家人，除咗可能會不時被追訪偷拍，其實好處都真係唔少。范冰冰細佬范丞丞最近正式於內地選秀節目《偶像練習生》出道。頂住范爺光環被受觸目實屬正常，連帶過去嘅一切都被翻出，除咗樣貌之外，有網友仲搵出冰冰早年受訪時，曾提及細佬將佢嘅電話號碼隨便公開，激到佢扎扎跳。

現年17歲嘅范丞丞，雖然同范冰冰相差19年，但冰冰對佢疼愛有加，不時分享姐弟合照，又喺節目中提起細佬。有網友翻出范冰冰2011年嘅訪問片段，當中提及細佬范丞丞好鍾意炫耀自己有個明星家姐，不時索取簽名相，派俾同學及老師，仲曾經拎同學電話打俾冰冰，將佢嘅電話號碼隨便公開，激到佢扎扎跳。

范冰冰憶述事件時，都感到哭笑不得：「有一天突然收到陌生人電話，聽到對方說「姐，我是丞丞」，以為他在學校出事，怎料丞丞回答：「我在學校拿同學的電話打給你。」」范丞丞仲要家姐同佢嘅同學對話，嚇到冰冰即時「命令」丞丞：「你要跟同學講，這個不是你姐的號碼，要把它刪除。」估唔到范丞丞細個咁百厭，如果日日玩電話，范冰冰應該會有排煩。