【萬千星輝】樂易玲話會全力捧紅旗下藝人　讚陳國強係追夢舵手

無綫《萬千星輝頒獎禮》完結後，公司高層樂易玲就向一眾藝人同事發表講話，表示：「老闆成日同藝人傾偈溝通，其實佢好明白你哋嘅心意，所以會大力咁推動我哋去製造一啲大熒光幕嘅機會畀大家，其實已經開始咗㗎喇。TVB同邵氏公司嚟緊就會開拍好多部大製作，畀我哋台前幕後嘅工作人員演員有多啲演出嘅機會。我哋會強勢發展電影基金，亦會有好多部大cast嘅製作，王晶導演亦都好好，佢有搵我哋嘅演員好似袁偉豪、蔡思貝、朱晨麗、王浩信去參演佢嘅大製作。咁當然佢嘅製作仲有其他重要角色，係會慢慢搵我哋嘅演員一齊參與演出。」

樂小姐強調公司會給予大量機會予TVB藝人，決心要捧紅他們，又說：「其實老闆都講過，過去有好多蜚聲國際嘅大演員，大導演、大明星，我覺得係嚟緊嘅十幾二十年後，香港或者係有華人嘅地方，嚟緊絕對可能係你哋各位。既然老闆應承同我哋，同TVB一齊努力，亦都答應同我哋嘅藝人一齊追夢，我覺得我哋自己最緊要裝備好自己，抓緊同珍惜每一個眼前嘅機會，將來你哋嘅前途係無可限量嘅。最後我借用阿姐（汪明荃）嘅一句說話『我希望各位藝人以能夠成為TVB嘅藝人而感到驕傲。我依家交返畀我哋嘅追夢舵手，老闆。」說完就交個咪給陳國強。