【萬千星輝．任噏亂評】賽果算正路 但《誇世代》憑咩拎最佳劇集
《萬千星輝頒獎典禮2017》終於頒完，以前好多人話TVB頒獎禮無公信力，啲獎亂咁派，所以睇唔睇都罷。不過今次TVB似乎好識做，好多受到觀眾歡迎的劇集、人物都有獎拎。最緊要嘅係，無綫兩套重頭台慶劇《誇世代》同《溏心風暴3》都在頒獎禮上觸礁，《誇世代》只有「最佳劇集」獎，而《溏心風暴3》更加係一個獎都無，呢個真係勢都估唔到，雖然話兩套劇收視都唔高，不過TVB今次真係夠膽唔俾獎台慶劇，抵讚！
賽前呼聲十分之高的兩位男藝員－王浩信和馬國明，分別奪得視帝和「我最喜愛電視男角色」，佢兩個拎獎相信都無人會覺得唔公平。而女藝人方面，唐詩詠首度封為視后，賽前大熱嘅佢，拎到呢個獎都算正常，至於「我最喜愛電視女角色」則由蔡思貝爆冷奪得，因為賽前其實都無乜人會估佢有獎拎，仲有李佳芯喺度嘛。至於「最佳男配角」由陳山聰拎都係正路，話晒佢喺星、馬都已經拎過獎，「最佳女配角」由朱晨麗小小爆冷爭贏朱千雪和姚子羚，不過頒俾佢又絕對唔算唔公平，始終她近年做戲愈來愈好，又有觀眾緣。麥美恩拎「飛躍進步女藝員」絕對係實至名歸，即使唔係戲劇組，但大家睇佢做主持都好開心。「飛躍進步男藝員」由楊明奪得，其實睇佢做咁多年劇，今年喺《心理追兇 Mind Hunter》扮一個有社交障礙的角色做得相當好，俾個獎佢都好合理。
其實最想講嘅都係《誇世代》拎「最佳劇集」，在過往的歷史，無拎過其他獎項但拎到「最佳劇集」就只有《天與地》和《女人唔易做》。其實《女人唔易做》在當年收視係全年最高，而且馬明都有拎到「飛躍進步男藝員」，至於《天與地》更加唔使講，當年被網民捧到去極點，拎到獎絕不為奇。但係《誇世代》呢？佢喺之前完全無拎過任何獎，收視亦未高過《同盟》，可能最尾有點跟風《天與地》想講香港未來的情況，但係最後又戴晒頭盔，完全無聲音可討論，咁究竟佢憑咩可以拎「最佳劇集」？
【萬千星輝】汪明荃爆seed講藝員心聲：加人工、山頭文化少啲