【渣馬2018】余德丞自言唔夠蔡思貝跑半馬咁勁：我跑10K都幾辛苦

今年有唔少無綫藝人都參加了渣打馬拉松2018，余德丞（Dickson）就是其中一位，比賽即將舉行，他亦已準備就緒。對於身為游泳健將的他來說，原來要跑10K並唔容易：「今次係我第二次跑10K，第一次係4年前，無第一次咁緊張，心情是期待同興奮。我12月中開始練跑，但之後工作比較忙就少咗時間練。練跑其實我一向都覺得係辛苦嘅，游水輕鬆好多，所以我嚟緊都唔會挑戰半馬全馬，最多都係跑返10K。我之前參加過渡海泳，如果要跑半馬全馬，我寧願游渡海泳。我4年前跑嘅時間係52分幾，今次希望維持返差唔多水平我就滿意喇。」

除了要練跑保持狀態，當然作息時間都好重要，身為藝人要每日都有充分休息實在好難，Dickson表示：「我5點9開跑，仲要預時間食早餐消化下，其實3點多已經要起身，所以呢兩日真係盡可能早啲瞓早啲起身，希望自己喺最短嘅時間適應呢件事，雖然咁樣唔啱，不過無辦法。嗰朝會食香蕉同飲水，做好保暖同拉筋。盡量enjoy個過程，唔好特別追求時間。」而他明日與同樣參加渣馬的蔡思貝跑完比賽，夜晚就會出席《萬千星輝頒獎禮》，翌日就再同思貝出發去緬甸拍攝旅遊節目，好chur呀。