【任噏亂評．溏心風暴3】仲拍系列續集？TVB不如正視自身問題先

《溏心風暴3》做了40集終於完結，如果以收視嚟睇，作為一套50周年的重頭台慶劇，一定係唔及格，甚至不於另一套同等地位的《誇世代》。如果加埋坊間嘅評價，直頭可以講係差！一成不變的套路，沉悶的劇情，加埋最尾係人都估到的大結局，由一開始大力造勢，到最後甚至連討論的聲音都愈來愈少。TVB歸究有兩個原因，一就是收視的計法並不統一，所以未能統計出最全面的收視，第二便是因為大陸率先播放，大家都已經上網偷睇了。

其實做完今次《溏心風暴3》，收視和評價都差並不是一件壞事，希望至少能夠令TVB重視這個問題，就係一個系列係咪一定要不停地拍落去呢？當年《溏1》和《溏2》，收視高收到破紀錄，因為社會出現小甜甜爭產事件，觀眾們對這個題材十分有興趣，加上仍然正值TVB的高峰時期，所以收得絕對係預期之內。但去到今時今日，爭產事件其實大家都已經再無感覺，如果你話係一套家庭溫暖劇，來來去去都係夏雨、司琪姐、菊姐等人，真係好容易令人厭倦，《愛回家》都由馬家變成龍家喇！再加上TVB的勢頭已經不如10年前，這個雖然未必關套劇事，但都絕對影響現在的收視，TVB除了要諗係咪仲要拍系統續集之外（法證先鋒已經準備緊第四輯），更加要諗吓係咩問題令到觀眾愈來愈少睇TVB。

【誇世代．任噏亂評】2047魔王亂港有深度 香港隨時會劇境成真

【任噏亂評．溏心風暴】網上盜睇唔係收視差借口 TVB幾時認輸？

【任噏亂評．溏心風暴3】一套脫節嘅劇集 不如搵農夫Do姐拍劇喇

歸根究底，TVB的風評愈來愈差，各方意見都指出劇集的創意度低，來來去去都是一堆演員，而且題材挾窄，仲要乜劇都要加條愛情線入去。雖然TVB今次其實都有好劇集，例如《踩過界》和《降魔的》，都是成本不高但拍出來有讚眾讚好的劇集，《誇世代》雖然作為台慶劇不算成功，但它的搞笑位做得好，如果劇集不是要拖長50集嚟做，縮返短啲，加埋編劇臨尾的天馬行空，絕對也可以成為一套好劇。講到尾，TVB其實唔係拍唔到好劇，只係有好多人都已經唔再選擇去睇TVB，同比起以前個個坐喺屋企睇TVB，時代已經變得好快，TVB追唔上呢個浪潮。不過睇住《降魔的》這個劇本由選募得來，其實係想有轉變，但轉得夠唔夠快，轉得好唔好睇，就要睇TVB造化了。