【G-1格鬥會】劉家良徒孫何慈茵奪冠打到周身傷：血腫乒乓波咁大

ViuTV前年首次推出實況格鬥節目《G -1格鬥會》，以𡃁模、藝人為作招徠，是非多多換來不俗的收視，節目去年底開拍第二季，8名參賽者當中，有一半以上具武術底子，個個都只求實戰，令節目花生性即時大減。
曾在第一季踢館失敗的何慈茵（Charlene），第二季捲土重來以參賽者身份打足咁多場，最後仲羸埋冠軍。打到血腫、關節劇痛、飛蚊症到底為乜？連佢自己都要諗諗先答到……

何慈茵的爸爸是洪拳師傅，也是劉家良的徒孫，她說5歲首次接觸洪拳後，因在學枚打架，結果被禁拳，直到14歲真正開始學習，女仔人家學打拳，受傷少不免，她也問過自己為乜要攞苦嚟辛。「可能係受爸爸影響，覺得女仔都可以玩得好型，所以愈玩愈用心。但媽媽思想比較傳統，所以一直都好反對，第一季只參加挑戰賽都係因為呢個原因，後來媽媽可能睇到我真係好認真去練，並非三分鐘熱度，態度開始改變。」

《G -1格鬥會》玩的是MMA，何慈茵雖然有多年的洪拳底子，但她說其實其沒有太大幫助，一切由零學起，４個多月的訓練時間，本身是健身教練的她每日保持教班，利用空檔去訓練，真不得不稱她為鐵人。「又要返工又要教班再加埋訓練，自己好似乾屍咁，係咁打又唔休息，搞到血腫乒乓波咁大，要睇鐵打放血。」她說第一季挑戰賽之後，因為撞擊導致出現飛蚊症，第二季比賽後，半邊面處於麻痺狀態長達8個多月，醫藥費同訓練費保守估計五位數字，但冠軍獎金才兩萬元，又係嗰句：「為乜？」爸爸為陪愛女訓練，試過買齊拳套護具主動要求做人肉沙包。「佢覺得我訓練時唔會出全力去打，咁落場唔得，結果有次我一拳打埋去之後，因為無帶拳套所以擦到佢流血，當下真係忍唔住喊咗出嚟。」

何慈茵說每當辛苦到想死時都會感到後悔，也提醒過自己「都係節目啫，唔需要太認真」但偏偏每次一落場都認真到不得了。「嗯……技術上好咗好多之外，自己亦都成長了不少……你問我得到乜，嗯……贏咗塊膠，哈哈！同滿足感。」小時候因為爸爸認為技術未夠班，所以一直不安排她參賽，《G -1格鬥會》是她人生首次出賽，勝利為她帶來了認同，也得到不少拳館的邀請她打職業賽。「我想keep住玩比賽，但太多東西要兼顧，真係要好好考慮。」沒有馬上拒絕，是因為真的心動，自得有潛質所以想一試……但能否過到媽媽的批准呢？真係要問過先知。

何慈茵有著甜美的外表，但她笑言絕對不會做出港女自拍等行為，訪問半日，嘗試叫她少女一點，結果全身僵硬。