【收視分析師】收視又有新玩法 ViuTV同奇妙幾時先肯公布收視？
撰文：溫菁莉
出版：更新：
歡迎收睇逢星期三中午嘅《收視分析師》，今日有好重大嘅事件宣佈，就係由2018年1月1日開始收視有新計法——7天跨平台總收視點。 CSM及Kantar Media被三家電視台(TVB、奇妙電視及ViuTV)委任做未來六年之香港電視觀眾收視調查機構。今日TVB下午就公佈了用新收視方法，並計算1月第一個星期嘅收視。嘩，全部節目收視全面提升，《溏心風暴3》由原本23.8點升至25點，《誇世代》就由24.9點升到26.1點。究竟新計法係點呢，以下會同大家講講……
【收視分析師】「是非精」夠癲夠嘈 《學是學非》收視廿點無難度
【收視分析師】TVB最好睇節目一定係除夕煙花騷 頒獎禮都要借過
新收視計算方法就係除了統計電視，手機和平板電腦等數碼儀器之外，用戶七日內重溫節目也列入計算當中。以TVB為例，就係其中一個是原本24小時內用電視盒子或者機頂盒追看，變成7日追看之收視。即係你而家隔幾日先煲劇，都會計入埋。有不少網友都話咁樣「水份」會變多，但其實大家有無諗過，咁樣對劇集收視表面上好似較有利，但今日嘅公佈得出的新收視條數就未有預期中咁高。
日前的《東張西望》亦有特別介紹呢個新計算方法，仲話更能全面同準確睇反映觀眾收睇電視習慣的收視率，並指此計算方法在其他國際例如英國及澳洲在幾年前已使用。我覺得要跟歐美係咁計，不如睇下香港鄰近出名電視業競爭激烈嘅韓國，當地的公營及有線電視台可以話係鬥過你死我活，點解？因為莫講每星期，每日出收視報告都嫌慢，為咗要炒熱人氣同話題，搶廣告收入，人哋係玩埋「實時」，即係每分每秒都有人mon住走勢。嗱！香港電視業，有競爭先有進步，如果ViuTV同奇妙電視都肯公布收視，就更好，加油喇！