【平安谷】阮兆祥星期一至日老是常出現 就算你熄電視都避唔到
撰文：鄺鈺瑩
出版：更新：
大台今晚有新劇《平安谷之詭谷傳說》播出，睇完之後坐等《溏心風暴3》結局篇，一套以民初為背景，一套係時裝劇，但有網民就發現原來兩劇都同樣有阮兆祥。
同一演員分別出現於兩劇在大台來說，一啲都唔奇怪，反正羅樂林都試過一日死五次，亦試過一晚兩劇四宗綁架，之不過，喺深宵時段嘅《皆大歡喜》，原來都有阮兆祥，換言之，時運高的話，真係一日可以見到阮兆祥三次咁多。
然後，當你周未想抖抖的時候，原來仲有個《荃加福祿壽》，時間為星期六下午1點15分，到星期日晚上，再以一個《性在有情》來迎接monday blue……對於將在三月同王祖藍、李思捷開騷《福祿壽十周年演唱會》的阮兆祥來說，真係好過畀錢落廣告。
如果你以為熄電視就可以解決老是祥出現呢個問題，對唔住！商台星期一至五、早上的《1圈圈》都係有阮兆祥份……另外，紅隧入口的廣告版，近日亦已被福祿壽三子佔領，真係問你死未？！