【渣馬2018】蔡思貝挑戰兩粒鐘跑完半馬　女鐵人再直踩台慶頒獎禮

「原來跑都可以咁好玩」呢句N年前某Online Game嘅Slogan，其實可以應用到大多數鍾意跑步嘅人身上。例如蔡思貝，一個月前透露自己參加咗「渣打香港馬拉松」，重拾返對跑步嘅興趣，仲有專業嘅教練陪跑。不過咁，今年嘅渣馬同TVB台慶頒獎禮咁啱都係同一日舉行，真係撞到啪啪聲！咁蔡思貝當日咪直踩20個鐘？可以稱為TVB第一女鐵人

就係咁，於是問一問Sisley，點知比想像中更加chur：「朝早4、5點起身去到現場準備喇，之後跑完就去睇物理治療，因為個腰傷都存在咗好耐，一直都忍住痛。睇完就直接返公司綵排，因為台慶有rundown，搞完就到夜晚。就算完咗，第二日都要坐早機去緬甸拍旅遊節目，都好緊密下，呢幾日都要執咗篋先。」晨早起床就要開turbo跑步，啲精力用晒喺渣馬度，仲有成日流流長，真係要捱眼瞓…Sisley坦言都有擔心過呢個問題：「跑完步會攰都好正常，希望台慶當晚氣氛high啲，個人會亢奮啲頂住…不過得返呢個星期，都有慢慢去調節，呢幾日都有早啲瞓覺，都好在有教練，所以應該唔太擔心。」

今次蔡思貝參加渣馬，絕對唔係為咗到現場影下個號碼牌打個卡就走，亦唔係「忽然Sporty」。之前佢都有參加過渣馬，當時挑戰10k，只係用咗48分鐘左右嘅時間完成。不過，Sisley練10k嘅全盛時期係可以44分鐘就跑完，對於女仔嚟講，呢個時間係好唔錯㗎喇！至於今次再挑戰渣馬，Sisley就揀咗半馬，而目標都非常清晰：「希望可以兩個鐘之內完成喇，得返一個星期，其實都好緊張，希望到時可以做得到喇。」對於運動型嘅Sisley嚟講，其實唔難！加上中學時期就有玩過田徑同打波，做開體能嘅佢，兩個鐘內搞掂絕對不是夢。