台慶臨時被彈鐘今年再邀請　羅嘉良「不了」專心大陸拍劇

樂壇成績表已經派晒，嚟緊嘅就差下周日（21/1）嘅台慶頒獎禮，聽講今次《降魔的》呼聲最高，究竟會係馬國明大熱跑出，定係王浩信實力取勝呢？邊個贏就仲未知，但賽前就好多花邊新聞出現，好似今日就有報導指大台邀請咗羅嘉良出席頒獎禮，皆因佢套《與諜同謀》入選咗男主角獎，但啱啱都講應該係王浩信同馬國明之爭，咁羅嘉良出席咪好尷尬？

其實仲尷尬嘅事都仲有，事源上年大台搞《萬千星輝賀台慶》嘅時候，已經邀請過羅嘉良出席，但事情搞得唔係幾愉快。聽講嗰陣羅嘉良要同個囝慶祝生日，訂晒機票，但大台就應該會補返筆錢畀羅嘉良取消機票同香港嘅車馬費，但就有傳因為嗰筆錢要幾萬蚊，大台就唔想畀，所以就突然取消叫羅嘉良唔使嚟。嘩，你叫我嚟就嚟，叫我走就走，咁咪好冇面，羅嘉良對大台心都淡晒。

點知隔咗半年都冇，有傳大台又邀請羅嘉良去頒獎禮，所以有媒體都搵咗羅嘉良問清楚，佢都好大方話如果有時間嘅都會出席，但因為趕住拍劇，分身不暇嚟唔到，其實見過鬼都怕黑，一陣又彈鐘真係「瘀」到爆炸。