【Friends】神劇無限loop　 23年後再翻煲《Friends》

聖誕在家食番餐雞煲聚一聚，為了應節，於自選影院揀咗套《Office Christmas Party》嚟睇，見到大茄Jennifer Aniston，朋友隨口嘆了句：「嘩，乜佢變得咁老！」Excuse Me!!!知唔知全盛時期的Jennifer有幾索？咁講有冇顧及《Friends》忠粉感受？睇《Friends》大如我，珍姐和其他五位主角是永垂不朽的！冇錯，一啲冇誇張，有一種劇，無論隔幾多年，就係永垂不朽.......講咁耐，其實想提提你，英美Netflix一早有得任睇十季的《Friends》，今年終於、終於、終於輪到在香港Netflix上線。

94年啟播，04年大結局，打後試過買VCD儲、上過內地網下載、這些年又深夜在Now 的華納電視斷斷續續追過，重溫冇十次都有八次。《Friends》對好多人嚟講，其實似睇金庸，更似周星馳電影，一樣係橋段笑位甚至對白都已經識背，見親都硬係要掀多次、唔捨得轉台，今次有得喺電子平台一次過由頭煲到尾，又係另一種層次同享受。感謝主，科技進步，愛煲劇的人有福了。

識煲梗係煲美劇，點解新劇大把選擇、大把潛力股成為新經典，係要揀套廿年前的來重溫？首先，經典不能不識。點解每季開播甚至每次重播收視都能高開、點解艾美金球年年提名攞獎、大結局成為美國史上最多觀眾電視大結局第五位、仲有點解六位主角由第一季每集2萬5美金酬勞加到最後兩季每集100萬美金、點解《老友記》唔止係一套劇仲成為一種文化，唔睇你又點知？

再者，雖則是廿多年前播出舊劇，不用擔心有代溝。笑位依然密集好笑、不論友情愛情定生活職場，其實去到任何年代要面對受困擾都係嗰幾味：夢想要追帳單都要找、眼前勞勞碌碌營營役役的又係唔係當真自己想要？錯過了的愛情仲追唔追得番？當友情升溫變愛情，是該勇敢去愛定留在安全線上萬無一失？個人嚟講，番睇再多次，第三季見到Ross同Rachel傾到天光依然得出分手結論，還是次次都會覺得赤......因為似曾相識......囉！當然，觀看過程中你總會見到call機、walkman、同識女仔仲要寫個固網電話號碼落張酒吧紙巾度，無傷大雅，因為科技再進步，人性，就是人性。

然後，即使Rachel、Monica、Phoebe、Joey、Ross同Chandler的六人行已經夠照，當年當紮、如今已經升上神枱的串星還是不定時出現包保見到會嘩嘩聲：出爐金球影帝Gary Oldman噴到Joey成面口水、《怪奇物語》神化阿媽Winona Ryder同Rachel玩過She She、Julia Roberts嘴完Chandler原來係為咗玩報復、Bruce Willis係Ross小女友的惡老竇、George Clooney由《ER》穿越咗去《Friends》睇症、蟻俠Paul Rudd同Phoebe結咗婚、回不去了睇番會掛念的Robin Williams，當然當然，仲有那些年仲係Jennifer老公、曬完恩愛無耐就出軌撻着Angelina Jolie的Brad Pitt.......太多太多、不能盡錄，於其話係彩蛋，其實繽紛過放煙花。

至於拍完《Friends》六大主角的去向和發展，除了Jennifer做過吓荷里活愛情片女王外，其他幾個的確發展一般般，新劇新角色都硬係俾人話脫離唔到舊經典、新瓶舊酒表演無厘新意喎......鬼咩！《Friends》成功過頭、入肉得滯，有錯咩？當廿年後，Lady GaGa見到珍姐都係話Ross and Rachel係神級CP、《權力遊戲》女主角Emilia Clarke見到Matt LeBlanc都係希望Joey當住佢面講一句「How you do'in」，你估經典本人唔覺悶嘅咩？