[成勛專訪]孖少女時代Yuri拍心裡的聲音　想做吻戲匠人定肩膊流氓

承接返上一個《香港01》韓迷頻道同《焦急的羅曼史》主演成勛做嘅訪問，下半部就同成勛傾到佢比較私底下一面！話說成勛喺《焦急的羅曼史》中，有一幕就講到成勛喺屋企煎牛扒畀Secret宋枝恩食，問返成勛如果喺現實中嘅話，會帶女朋友去餐廳食飯定返屋企親自下廚煮愛心餐時，暖男又聽話嘅成勛就表示：「只要係女朋友想嘅話就會聽佢講，女朋友話出去食就出去食，女朋友話想喺屋企食就煮畀佢食！」成勛真係好sweet又好錫女朋友啊！其後成勛再表示自己最叻就係炒飯，西式料理就唔太擅長，所以未來女朋友如果想食成勛整嘅西餐就可能要多啲包容喇！

攝影：陳順禎　鳴謝：上水廣場

講到成勛未來女朋友，又點可以唔問成勛嘅理想型係點呢？當時成勛諗咗一陣，先話：「如果外形嚟講，我比較鍾意可愛啲嘅，希望佢會有多啲嗜好，例如識得打機，可以同我一齊玩，一齊分享唔同嘅興趣！」想成為成勛嘅女朋友就要由今日開始學打機，培養多啲嗜好喇！

另外，提到成勛有「吻戲匠人」之稱時，佢都好謙虛咁回應：「其實都係虛銜嚟，因為導演拍得好，畫面影出嚟靚，所以先會令大家咁覺得。」明眼嘅韓劇迷，當然知道其實係成勛做得好啦！嚟緊成勛仲會出演綜藝節目《心裡的聲音2》，今次佢就會做李光洙之前所飾演嘅趙石一角，仲會同少女時代成員Yuri（飾演愛鳳）有對手戲添！《心裡的聲音2》今年就會播出，SONE（少女時代粉絲）同成勛嘅粉絲記得要支持啊！

成勛除咗有「吻戲匠人」之稱之外，佢個膊頭都好出名㗎，仲有「肩膊流氓」嘅稱號添！正當記者想向成勛借鏡，學吓點樣先可以做好身材管理時？成勛竟然回答：「我冇管理喎！成個星期都唔會做運動，有行程嘅話前一日就會匿埋喺屋企咩都唔做！」即時令記者一個頭兩個大，究竟點樣可以唔做管理，都有咁好嘅身材呢？

最後問到成勛究竟幾時先會嚟香港開粉絲見面會？真正同粉絲見面、溝通、玩吓遊戲咁？成勛就表示：「其實一開始我以為今次倒數係個人活動，不過可以同香港粉絲見面都已經好開心！嚟緊當然會想再嚟開粉絲見面會，不過就要公司方面商量好先得，希望大家再耐心等吓！」成勛真係有計劃嚟香港同大家見面㗎！再畀啲耐性等一多成勛一等啦！

【成勛專訪】聖誕節病住孤單過　《焦急的羅曼史》後有搵宋枝恩？

下載《香港01》App，更多韓星靚相、影片率先睇！

iOS：http://bit.ly/hk01app-iOS-download

Android：http://bit.ly/hk01app-Android-download

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/