【又做爸爸】高皓正宣布老婆懷第三胎：仔女叫我地生多十個
撰文：洪曉璇
出版：更新：
廣告都有話，養大一個小朋友要400萬，除咗金錢仲要無限心機，因為小朋友最需要嘅，正正就係父母親身陪伴成長。近年轉戰幕後發展嘅高皓正，同醫生老婆陸凱兒結婚接近8年，先後誕下一仔一女，一家四口樂也融融。雖然已經湊成一個好字，但原來佢地仲未收工，最近宣佈高太已經懷孕6個月，高皓正接受香港01訪問時就好開心宣佈：「多謝大家祝福，係囡囡嚟架。」
2010年，高皓正與拍拖年多嘅醫生女友陸凱兒結婚，二人婚後一直好恩愛，育有一子一女。女兒高純意於2012年出生，而兒子高神悅於2013年出生。高皓正14年約滿香港電視後，轉戰幕後工作，間中會現身ViuTv或奇妙電視節目擔任嘉賓。除咗成日喺社交網分享同老婆仔女嘅生活點滴，之前仲試過帶仔女拍攝ViuTv節目。早前佢太太舉行新書發佈會，見到佢肚大如籮先知原來又有新生命就嚟誕生啦。
即將再為人父嘅高皓正，接受香港01訪問時都難掩興奮心情：「多謝大家祝福呀，太太宜家有咗6個月，預產期係5月1號，係囡囡嚟架。小朋友知道做哥哥姐姐覺得好開心，好想即刻見到妹妹，仲話希望唔止一個叫我地生多十個，哈哈哈。」生BB唔難，要養大小朋友先有排煩，3個仔女分分鐘要成1200萬，高皓正都做好準備擔起頭家：「工作方面緊係要再努力啲搵奶粉錢啦，太太嘅診所同埋會經營啲美容產品。演藝事業嚟緊就主要攪電影，有啲國內投資計劃，希望好快成事可以公布。」