連凱鬧爆「男一號」要求替身代拍　張藝興、吳亦凡無辜中槍

國內藝人近年頻頻被指收取天價片酬但以替身上陣，就連馬國明之前接受訪問時都話親眼見過，內地明星拍完一兩個近鏡之後，其餘戲份全部由替身完成。而早已北上發展的連凱，今日亦在微博透露其公司最近製作新戲，開拍一個多月後，由於「某流量男一號」表示沒有檔期，故要求劇組用面具代替演員拍戲。連凱於文章附上4張出自佢特技技公司的面具相，其中兩張同劉德華同古天樂竟有九成相似。

連凱以照片說明公司設計呢啲面具，係專門畀武術組用來代替演員拍攝危險動作時用，而唔係用來拍文戲。「這樣下去日後還需要演員嗎？這是什麼敬業態度？製作團隊，大家要堅持，不要輕易妥協。」，由於國內公認的「流量男星」就只得吳亦凡、張藝興、李易峰、楊洋、鹿晗以及TFBOYS嘅王源、王俊凱，但連凱又未有點名批評，所以一眾流量男星即時躺著中槍，唔少粉絲都留言要求連凱「直接點名」，亦有人問連凱到底有無充份理解「流量」一詞。

而為免網友繼續猜測，連凱之後再次留言表示：「公開名字，這害了演員，如果有得罪任何人在此說聲抱歉。」更指發文完全是想提醒大家多點關注幕後人員，並強調自己的特技公司唔需要用呢招嚟到賣廣告。