【食得好健康】洋蔥原來分好多種　煲「紫洋蔥蘋果水」止咳有根據

大台十點半時段通常都係圍繞住「食買玩」，一係就跟住Do姐去旅行，唔係就同森美一齊去日本浸溫泉，2018新一年新開始，雖然今次節目都係離唔開「食」呢個字，但就玩得知性啲，搵嚟袁文傑、馮盈盈同煒哥教大家食物嘅冷知識，又OK喎。

今集就講洋蔥，唔講你唔知，洋蔥喺歐洲被譽為「菜中王后」，而且仲都分咗好多種，除咗我哋平時中餐食開嘅「黃洋蔥」之外，其他仲有紫洋蔥、白洋蔥同珍珠洋蔥，黃洋蔥同紫洋蔥產地主要係大陸，而白洋蔥同珍珠洋蔥就分別來荷蘭同澳洲。

洋蔥係好有益嘅食物，入面有前列腺素A可以降血壓、擴張血管；槲皮素同類黃硐可以解毒、提升免疫力同抑制癌細胞活性，總之就好平又好有益啦。

但最重要一點，就係話佢嘅維生素同膳食纖維可以降血糖同抗感冒，所以有個都市傳說就話將洋蔥放喺腳板底過夜就可以醫感冒，當然就好唔科學啦。

今集節目就搵嚟註冊中醫介紹大家飲「紫洋蔥蘋果水」止咳，好簡單，就係將紫洋蔥、蘋果同蒜頭加水煲45分鐘就完成喇。不過留意返，中醫話呢個秘方就只係啱寒性嘅鼻敏感同咳嗽，即係咳出嚟係白痰嗰種，而其他類型嘅咳嗽就未必啱。因為洋蔥功效係驅風寒同溫中通陽，而蘋果就潤肺，大家不妨可以喺家中試吓。

大家又睇吓中醫師點講：