【誇世代】無綫用貼地對白反映社會崩壞 食埋子華神金句好應景
撰文：黃梓恒
出版：更新：
《誇世代》昨日迎來了陳嘉寶和余德丞一起回歸，不過卻是以情侶身份，搞到本為余德丞女友的麥明詩十分傷心。不過陳嘉寶飾演的宋安安在回港後有極大的轉變，除了搶了自己堂妹的男朋友外，在心態上也有很多的變化，搞到飾演她老豆的歐陽震華都有些擔心，捉了她入房傾心事。
當歐陽震華問她為何有此轉變，以前的宋安安不是這樣，她就答：「你唔好同我講以前，以前嘅我兩個字可以講晒，愚蠢！你唔係覺得我為咗嗰啲所謂嘅公義，有書唔讀，走去抗爭唔愚蠢嘛？／香港無運行㗎喇，我哋做幾多嘢都好喇，香港人係唔會變，我哋呢一代就算捱十世都買唔到一層樓，我而家諗通咗㗎喇。唔好問自由係點，最緊要無乜風險，唔跟大隊就唔使怕醜，除非你快過隻狗。」
呢段說話跟TVB一直以來的取向十分不同，想不到竟然可以貼地地出街，認真唔話得，證明劇組都有花心思在對白上。而大家有無覺得最後一句對白好熟口面？其實子黃子華在2012年《洗燥》棟篤笑的金句，講述羊群效應的心理：「我哋做羊嘅，最緊要我哋要記住四句金句：唔好問自由係點，最緊要冇乜風險，跟大隊係唔使怕醜，除非你快過隻狗。喺人類裡面能夠離群，唔跟大隊，又走得快過隻狗嘅，係永遠都有啲咁叻嘅人，永遠都有啲咁卓爾不凡嘅人。」