唐詩詠電台爆喊多謝陳志雲：當年佢加我人工由3千變萬幾蚊

去年可以話係唐詩詠好豐收嘅一年，憑住劇集《不懂撒嬌的女人》Cherry一角跑出，早前更獲英國「大本鐘獎之金獨角獸獎電視類及視頻類」中獲得最受推崇女主角，其後更力壓同劇嘅Mall姐宣萱被網友推舉為本地民選視后。今日唐詩詠接受商台《一圈圈》訪問時，希望可以在台上多謝幫過自己嘅人，「有一個人好想多謝就係Stpehen陳志雲，剛入TVB月薪好低，好記得3000蚊，唔記得做咗幾年，跟住有一日佢同我講，『乜你月薪咁低㗎？不如公司加下你人工呀！』」講到呢度，詩詠已經忍唔住爆喊。

唐詩詠選視帝投馬國明一票：希望佢今次唔使再天然呆
唐詩詠做老闆中環派餅　西裝友爭住試食仲要求合照

唐詩詠指當時都唔知加幾多錢，「後來先發現加到萬幾蚊。嗰刻好感動，因為當時我啱啱入TVB，唔會夠膽同公司講唔夠生活要加錢咁，呢件事我一直放係心入面，希望有一日可以多謝佢。』她笑言以前參加台慶頒獎禮都係覺得陪下跑，睇下大家開心，「今次感覺係真係要落場比賽，好似之前拎到獎，有一刻好有深嘅感受，就係《不懂》劇組都好替我開心，有獎除了鼓勵我之外仲有鼓勵一班好努力嘅人（指劇組）。所以我會想認真去參與呢件事。』」

其後主持人阮兆祥問到係咪特別有壓力？唐詩詠直言劇集播完之後好驚觀眾年尾唔記得，但事實是好多人仲記住她在劇中的表現，「其實一直都諗要有獎，我好耐之前已經認為拍劇唔係為呢樣嘢，你一定要去享受個過程先可以拍到咁耐。仲要今次《不懂》首部4k兼全實景劇集，好多嘢未知之數，感覺好似打仗咁。」