【後生仔傾吓偈】麥明詩認會講粗口　曾對住媽媽講：關你X事

年輕人之間嘅對話，少不免會夾雜粗口，其實不帶惡意只為順口，不過如果係公眾人物講粗口，就好易被鬧教壞細路。馮盈盈參選港姐時，被挖出Facebook上有唔少寫晒粗口鬧政府嘅留言，被網民封為「粗口港姐冠軍」。估唔到另一位品學兼優嘅十優港姐麥明詩，都有講粗口架噃﹗佢喺J2節目《後生仔傾吓偈》中，自爆曾經對住媽媽講：「關我X事」令麥媽媽即時發火呀！

新一集《後生仔傾吓偈》中，研究講粗口文化，在場KOL幾乎人人都有講，覺得助語、鬧人同樣適用。估唔到品學兼優嘅麥明詩都覺得粗言穢語若然用得其所，並無大礙：「我覺得其實粗口係一個學問，有幾個層次，有啲係形容詞有啲係名詞，有啲係用嚟表達憤怒情緒。我覺得憤怒時唔應該再用一啲詞語去加附憤怒，或遷怒於人。但係對事對自己，或者形容一啲事，有時候真係好難用另一個字去代替，其實係詞窮嘅表現。」睇嚟Louisa都好有研究喎！

Louisa話自己有時會講粗口不過唔多，亦一定會睇場合收儉，不過就曾經試過喺媽媽面前不慎「爆粗」，搞出掀然大波：「有次同媽咪熱烈地溝通時，唔小心講咗一隻字粗口（邊隻字呀？），關你X事，其實真係衝口而出順口講咗出嚟，媽咪即刻好嬲好嚴肅，問我點解要用粗口鬧佢，搞到我即刻不停解釋，唔係要鬧佢，只係唔小心用咗一個粗口字去做連接詞。」

講粗口有時係口快快，Louisa仲試過手快快，覆網民留言時想撳心心，唔小心撳錯隔籬嗰個中指圖，send咗5個中指出去回覆，inbox又無得刪除，只能即刻同佢道歉話撳錯咗，再傳返10個心心補償。