【多圖有片】安室奈美惠再登紅白　唱里約奧運主題曲《Hero》道別

每年大除夕日本NHK電視台都會舉行《紅白歌唱大賽》，今年由組合嵐成員二宮和也、有村架純主持，內村光良則擔任總主持人。開場由白隊的尊尼旗下嘅Hey！Say！JUMP演唱《Come On A My House》，安室奈美惠睽違14年，再踏上呢個舞台表演，同時亦係最後一次現身紅白。電視台特別製作影片，回顧佢充實而精彩嘅25年演藝生涯，而安室選擇演唱里約奧運主題曲《Hero》，唱完後更眼濕濕向觀眾揮手道別，場面感人！

9月份於官方網站宣布引退嘅安室奈美惠，1998年曾創下紅白歌唱大賽超高收視紀錄，相隔14年後再現身呢個節目，佢身穿白色長裙參與紅白演出，喺香港時間31號晚十點幾，電視台先播出25年來安室嘅輝煌演藝生涯片段，然後鏡頭一轉影住身在另一錄影廠嘅安室，佢話自己過咗十分充實嘅25年，好多謝樂迷一直支持，希望以自己方式迎接引退嘅日子。其後佢唱出里約奧運主題曲《Hero》。雖然踏遍無數舞台，但唱完一曲後安室亦難掩激動心情，眼眨淚光依依不捨向觀眾道別。