厭倦捱更抵夜　前港男吳雲甫：TVB唔係日夜顛倒，直頭係日接日

有陣時覺得做藝人，條命要生得好，萬一唔好點算？至少都要抓緊機會。現年37歲的前港男吳雲甫（Owen），最近返回內地拍劇搵真銀，收入比以前在TVB高五倍。Owen無考慮自己紅定黑，只想嘗試更多及搵機會，於是他決心離開TVB，原來已外闖了兩年。

「我以前喺TVB好似返Full Time加Part Time咁。呢頭做完娛樂新聞台主持，嗰頭就去拍劇，我最記得咁樣嘅工作模式之下，有一個星期都冇返過屋企。」講到香港工時最長？TVB活生生是個樣板，還不止馬明一個。「我當時有份開《On Call 36小時》，見得最多就係馬明，佢就好懶嘅，見要直落咁耐，索性拍完喺休息室瞌陣沖過涼再開工囉。」原來馬明並不孤單，TVB還有人陪他捱更抵夜，如今馬明成為視帝大熱，而吳雲甫選擇不再過無分日夜的生活。

「我喺TVB拍到睇過好多次日出，已經唔係日夜顛倒，直頭係日接日。」Owen既做娛樂主播，又要拍劇，高峰期試過連續開工三日，換來相對可觀的收入：「頂盡都有三萬蚊一個月，夠我養車供樓。」雖然世界從來是多勞多得，但以無限體力換來三萬蚊，其實背後意味深長。Owen的合約與其他藝員不同，他正職是個娛樂主播，拍劇機會相對較少，也不屬任何黨派，所以Owen以他的方式搵辛苦錢：「有時客串一、兩集，識到啲PA，咁同佢哋傾開偈熟咗，有時開工要到人，我又得閒咁就去囉，做做下佢哋就會用開我，我都明白係要咁樣儲返嚟。」

好多年輕人都會以「搏盡無悔」為座右銘，Owen當時未有明言，但身體力行：「我覺得冇乜所謂。因為大家爭住畀錢睇林峯嗰啲小生，而我係同佢地共事喎…之前又幫過容祖兒伴舞咁，自己諗落都OK呀。」可是人始終會有疲態，橡筋拉得太緊，都會想放下腳步：「我唔係好想紅，唔係好想發達，但係TVB工作嘅模式唔係好健康，拍一套劇冇晒日夜，而我好多嘢試完就完，既然係咁，就離開一下會試唔同嘅嘢。」於是Owen離開TVB，還好因著以前做娛樂新聞主持的經驗，認識到製作人，嘗試到內地發展。今次也是著名導演王晶的安排下，往內地拍劇。向來拍劇都是行行企企、一句起兩句止的Owen，遇到一個真正的角色，笑言：「而家有得對白講，反而會好緊張。」

點緊張都好，由腿部運動變成有得口部運動，始終都是好事。可以開口說話，收入都比以前截然不同，至少高5倍：「以前係TVB拍劇，就算個一集拍咗十幾日，計嘅錢都係計一集咁多，藝訓班出嚟一集得個千幾蚊，可想而知有幾參差。」除了收入比以前好，在內地拍劇不用再日接日：「最盡多數拍到收工去食個宵夜，以前喺TVB拍15、6場嘅戲，喺內地6、7場就搞掂。」

在內地搵到真銀，Owen沒有後悔當初「入錯班」。選港男沒有光環，所謂噱頭只是曇花一現，Owen最初入行已明白事實，沒有抱有太大期望。而他後來開盡Turbo，拍劇所學的執生技能，在內地工作成為劇組人員欣賞他的原因：「以前一個劇組出外景得一個梳頭化妝，理得主角配角，我呢啲行行企企點會有人理？所以學識點去照顧自己，冇人幫自己化妝，咪帶多個粉樸自己化。就係咁，去到內地可以自己搞掂，仲可以take care埋其他人。」Owen做得快手，往後機會長做長有。其實諗落，如果話TVB係一個唔好嘅地方，不如話係一個會令藝人獨立、成長嘅學堂。