相隔431日再合體 S.H.E數百歌迷接機險癱瘓機場
撰文：洪曉璇
出版：更新：
眨下眼S.H.E已經出道超過16年，當年三個小妮子參加歌唱比賽，被挑選成為組合出道，多年來姐妹情深。自Ella陳嘉樺懷孕並誕下囝囝勁寶後，三個人一直分開工作，相隔413日後終於再度合體，飛到浙江參加跨年晚會，數百Fans蜂擁而至接機，差啲癱瘓深圳機場。唔單止歌迷興奮，S.H.E難得聚頭都傾到唔停口，仲睇片睇足成晚添﹗
S.H.E將「SHERO」、「美麗新世界」和「Super Star」串成組曲，並演唱電影《少年班》主題曲《你曾是少年》。出道多年早已成為一線天團，估唔到彩排時Selina居然話好緊張，不停翻聽演唱編曲：「很怕太久沒唱，都生疏了。」Hebe仲因為唔習慣keep住唱高音，可能因為彩排時賣力張嘴飆高音，吸進太多冷空氣，凍僵喉嚨差啲聲沙。
演出前一晚明明應該好好休息，但佢地三個居然傾到唔帟瞓，Ella笑言：「三人在一起，就有聊不完的話題，心情特別放鬆。」彩排結束後都唔捨得分開，為保持演出時最佳狀態，拒絕宵夜誘惑，聚喺房入面大傾特傾。Hebe話：「我們在房間敷臉、拉筋、擦指甲油，為隔天的合體暖身，是一場相當有建設性的聚會。」Selina仲話大家圍埋睇片，Ella手機入面勁寶嘅一段段可愛短片呀，難怪佢地會唔願瞓啦。