【BB來了】李佳芯兒時回憶有血有淚：我會駁嘴同埋覺得好委屈

李佳芯（Ali）今日出席新劇《BB來了》拜神儀式，劇中Ali和黎諾懿飾演新生父母，從照顧新生兒的生活中，以搞笑的方法説出做新手爸媽的血淚史。由於新劇飾演媽咪，令Ali想起自己和母親之間的生活點滴。

為人父母甚艱難，想錫你但又不能太縱你，Ali笑言與母親關係不俗，印象中沒有特別吵過架，惟獨有一次經歷讓她很深刻，因為搞到好大件事：「嗰時係小學8、9歲，因為我細個係好鍾意氫氣球，有一次我返學嗰時見到個氫氣球，人哋唔要丟喺度。我就覺得個氫氣球「好得意」，跟住我就攞咗返屋企。攞完返屋企之後，媽咪就問我：『你做乜攞人哋啲嘢返嚟？！』佢個concept就係，你鍾意咪叫我買，做乜要攞人哋啲嘢。但我嗰時就覺得，『人哋唔要，我咪攞返嚟囉』。嗰時我咪駁嘴囉：『咁人哋唔要我唔係偷吖嘛。』我就覺得好委屈。」

可是最讓Ali深刻又驚心動魄的，就是發生流血事件。「佢嗰時仲就好大反應咁鬧我。嗰時啱啱食完飯，我仲好記得佢好大力咁拍對筷子落枱，對筷子就斷咗，飛咗去第二度整傷咗我額頭，跟住就流血。但係佢就仲驚過我，因為佢以為整傷咗我隻眼。我就喺度喊：『做錯咗啲乜嘢，點解要咁對我，點解要鬧我？』佢就好內疚咁，幫我止血安慰我。」所謂「愛之深，責之切」，更何況Ali後來受傷？做人父母，就算仔女不聽話，見到有甚麼冬瓜豆腐，還是會心痛，氣到最後一筆勾銷，而Ali說到這裏，內心都有一股暖流：「我同佢最似的係一樣咁硬頸，一樣係個口好硬，但係心軟。」這一刻會覺得，心軟其實是優點。

雖然這段回憶有血有淚，但Ali對媽媽還是讚不絕口：「媽咪係一個好tough、好勤力嘅媽咪。佢無論去到邊度打工，幾多歲都好，都好努力搵錢做嘢嘅女強人。因為媽咪有9兄弟姊妹，而佢係排最大，所以由細到大，佢都係一個大家姊嘅角色。唔係話佢係一啲好巴辣嘅大家姊，而係佢好識得照顧人，好識照顧屋企嘅一個人。就算生咗我哋都好。佢嘅生活，佢嘅世界都剩係得屋企。佢好少有自己嘅娛樂同埋朋友。佢淨係返工放工搵錢同照顧我哋。即係佢最大嘅生活就係我哋，就係佢啲仔女同埋老公，呢個就係我真實嘅媽咪。」所以話，媽咪真係偉大，Ali都好珍惜同媽咪相處的時光。