黃建東惡搞譚凱琪網劇　難得與蝦頭合作齊齊度gag

TVB為試新嘢，月初時拉大隊到北海道用實景拍網劇《聖誕天降奇緣》，兩位主角譚凱琪同黃嘉樂都話誠意十足，四集網劇話咁快播完，負責製作嘅SeeSeeTVB趁聖誕大放彩蛋，不過，主角就變成了黃建東同蝦頭（楊詩敏），並名為《聖誕天降奇緣現實版》。話明係現實版，對白唔純愛之餘更充滿排泄物。

故事同《聖誕天降奇緣》一樣，都係以「重遇」為主題，不過，蝦頭對於黃建東呢位中學同學嘅印象就十分麻麻，而二人重遇嘅契機，係因為蝦頭食完嘢發現自己無帶銀包，做夥計嘅黃建東即時出錢相救繼而冰釋前嫌，最後更結為一對。「早前黃嘉樂同譚凱琪拍了一條聖誕宣傳片，特地到日本雪景拍攝，非常優美。現實中冇可能個個都咁浪漫，所以佢哋搵咗我同蝦頭拍咗條現實版，想帶出個訊息就是無論白雪公主定黃面婆，白馬王子定大肚腩，陪在你身邊的就是你最珍惜的人。」

阿東最開心今次可以同蝦頭合作：「其實以前做舞台劇已經認識佢，但冇真正試過有對手戲合作。今次可以飾演夫妻，非常好玩。臨場仲度咗好多gag，包括排隊洗碗便排卵，仲有親密鏡頭，但令到現場工作人員笑到碌地。」阿東今次首似扮聖誕老人，對於減肥尚未成功的他十分有優勢。