【後生仔傾吓偈】馮盈盈私伙上陣　同麥明詩校服look好吸睛　

好多人都會對校服有情意結，覺得著校服有一種莫名的吸引力，昨晚播出的《後生仔傾吓偈》就特別吸睛，因為麥明詩（Louisa）、馮盈盈（Crystal）以及陸浩三位主持人與一班大學生KOL齊齊著上校服出鏡，好似重返中學校園時，好有青蔥歲月feel呀！他們分享了在中學時的開心片段，例如上家政堂的「蝦碌」事，上堂做過的搗蛋嘢，用過的古蠱招數、解剖經歷等等，真係回憶返晒嚟。Louisa同Crystal仲即場跳啦啦隊舞步，好pure好青春呀！

香港01記者電話訪問了Crystal，原來她在節目中所穿著的藍白色校服，真的是她讀中學時著返學的那套校服。Crystal說：「係我私伙嚟㗎，我好鍾意呢套校服，覺得嘅時候就著好有意義，有好多回憶，所以畢業後一直keep住。我之後開party都有著過㗎，大學一年級嗰時，啲同學見到都覺得好搞笑，以為我玩cosplay，其實真係我套校服嚟。Louisa著嗰套就係道具嚟，有啲人話我哋兩套校服好似，咪即係話我套校服似道具？」

講到讀中學時做過甚麼Crazy行為，Crystal說：「除咗節目入面講嗰啲，我仲曾經同一班同學組隊參加舞蹈比賽，跳少女時代嘅歌，人哋其他隊就跳中國舞、社交舞同現代舞嗰啲，得我哋跳k pop舞，結果都入唔到圍。雖然跳舞無得入圍，但我哋之後有再接再厲組隊參加音樂比賽，唱F4嘅《流星雨》，其他人就唱musical、classical呢類好正經嘅歌，得我哋咁另類，最後都係入唔到圍。不過我哋無所謂，志在參與開心下，老師都知我哋鍾意搞笑同玩，但係讀書時係好認真嘅。我仲試過上堂時將喺家政堂用剩嘅生雞蛋跌咗落隔籬個同學身上，搞到佢件衫沾晒蛋。」

Crystal回想讀中學時確是一段好開心的日子：「我讀女校識咗好多好朋友，已經成為咗閨蜜。以前爹地媽咪都有擔心我讀女校可以會太單調，但其實唔會。我覺得讀女校簡單啲，大家都係女仔可以好單純咁相處，唔會花時間去諗戀愛拍拖嘅嘢，可以專心讀書啲。如果我第時生女都會畀佢讀女校。」