【萬千星輝】楊明第5次提名飛躍 台上自嘲：我係old seafood
撰文：林迅景
出版：更新：
《萬千星輝頒獎典禮2017》1月份就會舉行，各項提名亦都在今天（12月21日）全數公布。每年到這個時候，全港電視觀眾都會好似買賽馬咁，「貼」自己嘅心水目標，演員又會順便拉下票。
TVB每年都係同樣地宣傳，同樣地舉辦，獎項名單亦都相差無幾。站在觀眾立場，雖然TVB搞足咁多年頒獎典禮，好多事都已經公式化，而大部分人扭開個電視機亦只係純粹睇下星咁解。不過，如果大家站在演員的身份角度諗下，呢一個每年一度嘅頒獎典禮就顯得好重要。
就以今年「飛躍進步男藝員」為例，有《踩過界》張振朗、《親親我好媽》何廣沛、《降魔的》黃子恆、甚至乎有「飛躍男藝員提名王」之稱的楊明以及以節目主持入圍的陸浩明。
陸浩明：「完全估都估唔到我可以入圍，所以第一個邊個通知我呢，就係麥美恩WhatsApp通知我。所以我今次都好驚喜，可以話係聖誕之前收到嘅一份好大嘅禮物。尤其是我細細個就已經有睇陽明嘅作品，好難得今次有份可以同前輩一齊角逐『飛躍男藝員』，所以我今次呢票反而會投俾楊明。」
睇返以往記錄，楊明由1999年加入TVB 18年的歷史至今。楊明已經先後被提名4次，2017年這次的提名已經是第5次。就連頒奬典禮公佈提名名單的活動上，楊明都自嘲自己為「old seafood」：「咁多年都係飛躍男藝員，我都一把年紀啦。不過我都好開心，證明咗我仲好後生，同埋我仲有進步空間。」