唐詩詠選視帝投馬國明一票：希望佢今次唔使再天然呆

啱啱同田蕊妮去完不丹旅行嘅唐詩詠，今日都著得靚靚出席台慶頒獎禮提名名單記者會，詩詠被問到對於視帝有咩心水時，她嘆了一聲氣之後就話，「我真係好想馬明（馬國明）拎呀，因為王浩信之前拎咗喇（在新加坡舉行的《星和無綫電視大獎2017》取得「我最愛TVB男主角」獎）。哎呀，可唔可以兩個一齊拎呀！」緊係喇，一個係好友，一個係熒幕上好拍檔，要二選其一真係難過登天！

唐詩詠解釋馬明都入圍過好多次，但最終還是與獎項無緣，替對方感到可惜，「希望佢今次唔使再天然呆，佢係屬於舞台上面！今年自己與馬明在劇集演出，都有好大嘅迴響，好想可以一齊係台上拎獎。」其實唐詩詠今年都有份入圍「視后」獎項，佢笑言個個對手都好勁，「又有Mall姐仲有鮑姐，簡直係神枱級前輩，能夠同佢地一齊入圍係榮幸！」

至於「最佳男配角」獎項心水，詩詠就希望陳山聰可以拎到，「因為佢有好多經歷，作為一個演員有好多經歷係一件好事。我替佢開心原因係佢無放棄演員嘅路，憑着自己努力得到觀眾認同。」而之後要詩詠揀「最佳女配角」獎嘅時候，佢就揀咗蝦頭楊詩敏，「蝦頭每一次演出都可以將層次提高，佢今次嘅演出都好好，希望佢可以拎到。」