杜汶澤世紀難題考起fb友　香港仔隧道行邊條線好：虛心求教

杜汶澤出名敢言敢行，平時見佢好鍾意喺Facebook分享生活照，平時有感而發評論社會時事，深受網民喜愛，可以話係個好出色嘅KOL。上個月佢喺Facebook駕駛Group求助網民，杜汶澤上載咗幾張停車場嘅相，原來係隔壁架七人車泊得太出，阻住咗佢出車，佢仲嬲嬲豬咁話：「或者我泊車技術差啦，硬係覺得呢個位有少少難泊！唔知佢車頭預咁多位呢種手法其實係想表達啲咩呢？」事後網民話佢嘩眾取寵、小事化大，仲引用政府嘅準則話四個轆入曬就無問題。

事隔一個月，杜汶澤今日又去駕駛Group請教網民，經過上次之後，今次佢就學乖虛心問大家意見。原來佢搬咗辦公室入黃竹坑，但喺收工時候揸車行香港仔隧道出銅鑼灣時，就成日塞車，杜汶澤就想問究竟係行左線定右線先唔塞？嘩，呢個真係世紀難題嚟，唔少網民都搞笑用《頭文字Ｄ》Cap圖留言，亦有人突破盲腸問杜汶澤張隧道相係點影？事後杜汶澤就開估，佢話原來有警察係銅鑼橋面控制左右分流，所以行左行右都會塞啊。但提提大家，入咗隧道千祈唔好因為塞車而亂Cut線，唔止係好危險，仲有可能會被隧道方面罰錢。