亞視手機App試玩《百萬富翁》　問題易到小學生都識答！

《百萬富翁》除了想起陳啟泰，還有陳芷菁的「我讀drama㗎！」之外，亦會知道這個節目在千禧年代，唯一可以撼贏TVB的節目。昨日亞視正式宣布復活，曾是收視保證的《百萬富翁》自然成為頭馬，並加大力度地宣傳。雖然主持人陳啟泰今次沒有回歸，但ATV不是省油的燈，成功找來前無綫高層陳志雲做主持，並且已拍宣傳短片，feel到亞視今次真係嚟料。

亞視今次同樣會招募全港參賽者。以前賽前會有節目《百萬富翁快而準》，每日選出十個參賽者，但今次比較user-friendly，就活用手機App，先登記做會員，就可以答問題，一Round有5題，答對5題有一分，一日最多可以玩5Round，一個星期最多可儲35分，自動參加抽獎，有機會獲得現金獎500元。其實基本上答對一Round就可以得到參與《百萬富翁》的資格，成功登記就會得到面試機會，繼而上場玩比賽贏一百萬。

記者與同事有試玩過，並玩了5 Round。亞視官方就話問題分了Level 1-5，難度循序漸進。不過同事們就覺得問題難度偏易，屬於小學生都識的常識題。例如：「世界盃足球賽每隔多少年舉行一次？」、「十二生肖中，緊隨馬之後是哪個生肖？」、「中國一年有多少個節氣？」等，這幾條問題，有近貼時事或了解中國文化的人，一定會識，而且真係大部分人都識囉！

不過都有被難倒的時候，要熟悉歷史。例如「波斯灣戰爭於何年發生？」、「袁世凱稱帝之後，自封帝號是甚麼？」又或者會有90後未必識答的題目，就好似「1998年之前，香港歷史博物館原址在哪裡？」更有一些會fake人的題目，就好似「西方的南瓜湯是甚麼顏色？」第一下會想起橙色，但覺得問得未必係，但當所有答案只有橙黃色最合理時…點知真係橙黃色，真的會在思考過程中浪費了一點時間。

其實內裡問題雖然簡單，但玩落又覺得幾有趣味。如果亞視再獨立推出《百萬富翁》問題App，都有得諗，起碼個人知識可以再提升。