李國麟《回到三國》做劉備未夠皮　《火鳳燎原》舞台劇再演曹操　

以三國故事為背景，港產經典漫畫《火鳳燎原》，明年1月將再次搬上舞台，改編成舞台劇《亂世英雄》，而演出曹操一角的則是無綫藝人李國麟，是繼無綫劇《回到三國》後，再一次演繹三角人物，而且由仁義的劉備變為演出一代奸雄，相當出人意表，而且劇中還有文青女神袁澧林飾演小孟一角，讓人十分期待。

李國麟現時每晚在《溏心風暴3》出場，演出紳士貴族許家大少Alan，入型入格，其實李國麟入行40年，可以說是扮乜似乜，而這位實力派踏上台板演出舞台劇一樣無難度，對於演出曹操一角，他有獨到的心得，「劉備同曹操係南轅北轍兩個人，最重要係跟隨導演指導去演，去演出嗰個tone。其實我演出舞台劇都唔係新手，幫「藝進」演咗過百場舞台劇，不過嗰啲係鬧劇，亦有幫馬浚偉演過《偶然．徐志摩》。」

眾所周知，舞台劇一般會較為誇張，但李國麟卻笑稱做電視習慣自然，「呢個係正劇，我唔會用好誇張嘅手法去做，只會放大少少個演法，因為舞台劇無close up，要照顧埋後排觀眾，只係動作放大少少。(有否看過原著漫畫？)我冇睇過套漫畫，但我知劇本由漫畫衍生出嚟，再經過編劇改編，加埋導演叫我哋嘅演繹，但漫畫就係畫出嚟嘅，而演員係有血有肉，當然我哋要把握到個靈魂人物啦，幕前幕後互相配合，先可以俾到觀眾一個開心滿意嘅舞台劇。」

近日內地熱播的劇集《軍師聯盟》，劇中飾演曹操的演員于和偉，演技大受好評，而且跟李國麟一樣，不但演出曹操，之前還演過劉備角色。李國麟表示：「我從來唔會去同人比較，我就係我，佢就係佢，若要人似我，除非兩個我，佢哋搵得我梗係用番我嘅演繹手法啦，但舞台劇唔係只係睇我，要幕前幕後配合。有少少遺憾嘅係我幕前工作頗忙，雖然我演出可以勝任，但擔心對手對我嘅信任感唔夠，始終我排戲嘅時間比較少，但在我立場只可以盡我能力做到最好，出嚟效果就要等觀眾評定。」

劇中除了李國麟、袁澧林，還有葉進(飾陳宮)、陳健豪(飾呂布)、喇英(飾張遼)、郭穎東(飾郭嘉)、鄭嘉俊(飾荀彧)、文傑聰(飾遼原火)、陳仕文(飾司馬懿)等資深舞台劇演員。舞台劇《亂世英雄》講述呂布中了水鏡八奇之計，跟手下陳宮、張遼均成為階下囚，但最後只有張遼生還，究竟當中發生了什麼事，「真相」又是如何呢？留待觀眾慢慢入場欣賞。