【三個院子】應采兒霸氣禁騎電單車　陳小春SHOW客家話街市講價

陳小春以前係出名嘅火爆浪子，但自從遇上應采兒之後，就被收得貼貼服服，老婆講一佢唔敢講二，叫佢行東唔敢走向西。陳太雖然看似係惡妻，但其實不知幾愛小春。繼親子真人騷《爸爸去哪兒》後，小春放低囝囝Jasper，孖住老婆接拍新節目《三個院子》合力經營民宿，將兩公婆私下一面放喺大家面前。呢日播出首集可以睇到，人前人後應采兒都一樣霸氣，軟硬兼施成功令小春言聽計從。

節目中小春同應采兒收到第一批住客電話，話因為船期延誤會遲啲先到，拜託小春幫忙買海鮮同蔬菜。估唔到呢個要求就辣着小春，電話收線後小春就好忟咁話：「現在他們要吃海鮮，我去買海鮮給她，那如果她要去按腳，我要去找個按腳師傅給他們按，是這個意思嗎？我為甚麼要幫他們買東西吃呢？」應采兒本來都好言相向，不過小春愈講愈激動，應采兒一句怒吼：「她叫你怎麼樣就怎麼樣嗎！」就咁一句KO小春，死死地氣去買餸。

好多男士都愛車如命，揸住電單車風馳電掣感覺上非常有型，但女伴通常都嫌皮包鐵太危險。小春本來想揸電單車去買餸，立刻被應采兒喝止：「不准﹗你每次都會弄傷自己，不准騎哦，技術差的要命，上次摔倒就是，你就看一看就好了。叫車，過來。」雖然小春嘴扁扁，不過都係聽老婆話去搭車，霸氣嘅嘢都係留番獨處時先展現啦。小春去到街市即刻成個生猛晒，用客家話向同鄉搭訕講價，就好似山雞哥出巡一樣。