江美儀是非多以為無緣提名視后　否認態度差：我執着唔係想人難受

自從TVB公布頒獎禮部分入選名單後，一直引起了廣泛討論。視帝之中，馬國明與王浩信的呼聲最高；不過視后就有好多選擇，競爭非常之大。有份爭視后的江美儀，早前在電台接受訪問，重提自己在2017年有不少是非，一度以為自己沒有機會入圍，直頭「玩完」，所以見到提名很驚喜：「我其實真係冇諗過㗎，當時我真係好激動，實在發生太多事，我以為玩完㗎喇…之前畀人話我嘅態度，又停廠喇，其實當時個個都唔睇好呢套劇㗎，又唔知會唔會播呀，算喇！有一堆好負面嘅新聞，唔關我事又入我數，真係難為了家嫂，都諗住玩完喇我。」就算今年《親親我好媽》收視勁過重頭劇《不懂撒嬌的女人》，江美儀直言只得三日鮮：「個熱潮會過㗎嘛！過咗兩季，就會冇人記得。」

得到提名，江美儀心情一直都好激動，由公布提名到TVB聯歡晚會兩天時間，她終於忍不住來個大爆發：「見到咁樣，就覺得原來自己做嘢都唔錯喎，諗到呢到就好感觸。」但知道競爭很大，於是忍不住在台上講感言：「未必有機會講㗎嘛，競爭咁大，講定先，實冇蝕呀嘛！」其後，江美儀間接回應負面新聞，她執着的態度有時會讓人誤會，「其實想畀大家知，我一直以嚟都保持自己演出嘅質素，一定要做得好，呢個係我招牌，而我有時嘅執着同堅持，唔係想令大家難受，我只係想保證出到嚟嘅嘢係好。」不過，講完一大輪，江美儀有份被提名都想攞獎，實屬人之常情，「其實都係為TVB挽回少少士氣，因為咁多膠劇，有一套可以咁高收視，自己都爭返口氣。當然拎埋獎就圓滿喇。」