林志玲開口談與言承旭關係：如果確定是愛一定毫不猶豫

林志玲曾經喺節目中講過，佢同言承旭仲係模特兒剛入行時已經認識，02年被傳媒影到佢地一齊睇戲至今，已經糾纏足足15年。上個月佢兩個被影到於馬來西亞密會，世紀復合嘅消息一出，外間都希望佢地能開花結果。林志玲呢日現身高雄，一班睇住佢大嘅記者都送上無限祝福，志玲就話：「現在的報道都是媒體朋友的期待，我就像是圓夢小天使，如果能往好的方向走也是一件很美的事情。」

傳出復合消息後首次於台灣出席活動，有好朋友黃子佼做主持，林志玲應該比較心安。(視覺中國)

一如以往，林志玲提起感情事，都係比較保留，無講到非常確實。同言承旭到底係咪復合？「是剛聯繫的階段，其實和你們同步，是一個很好的轉彎。(是否為友達以上、戀人未滿？)我無法回答，言多必失。我們還需要更多的時間、空間，如果確定是愛，我一定毫不猶豫。我對婚姻仍有期待，也希望能當媽媽，擁有自己的孩子，只是目前大家對我的婚事實在是過度關心，對我的情事捕風捉影，但我不會委曲，這是大家對我的期待，我是圓夢小天使，也算是完成大家的夢想！」咁嚟緊嘅聖誕節有無再約吓了解吓呢？林志玲坦言目前有朋友開口邀約聚會，但仲未確定，志玲亦都話最好嘅禮物就係陪伴，能花時間陪伴重要嘅人就係最好禮物。

每次現身都會被追問感情事，林志玲都要動動腦筋如何大耍太極回應。(視覺中國)

就係呢一張相，嗰幾條又淡又幼嘅魚尾紋，令人驚覺原來林志玲都會老。(微博圖片)

貴為女神，志玲姐姐今年已經43歲，但凍齡有術，2007年至今，每年都高踞FHM全球百大美女頭十位。9月時英國《每日郵報》更於報道中以「A flawless actress from Taiwan(來自台灣的完美女演員)」嚟形容佢，不過早前一張2014年，林志玲到貴州出席活動無修圖嘅相重新出土，被影到眼角出現3條魚尾紋，網友紛紛指「不老神話破功」，志玲呢日就笑言其實呢啲係每個人都會面對嘅成長：「大家對我好嚴厲喔﹗當日皮膚比較乾，畢竟大家對我有某種期待，我以後會記得把它藏好，不要讓它出來打招呼！」

所以話女士補濕真係好緊要，呢日林志玲嗰三條魚尾紋又唔見咗啦。(視覺中國)