苑瓊丹4月返TVB拍劇 冇幫亞視復活：唔食得兩家茶禮
撰文：郭敏玲
出版：更新：
「石榴姐」苑瓊丹最近投資過千萬大搞生髮中心，今日一身「石榴套裝」現身舖頭，同大家講：「我用晒成副身家落去㗎喇！」
藝人有副業好正常，多數開餐廳，又或者買下Fashion，但苑瓊丹就搞生髮中心，因為她一直有尋生髮：「我試過好多方法，外敷內服又試過，食到入醫院就嚟死都試過，直至搵到呢個咁天然嘅方法，所以咪索性傾埋專利。」
買咗專利咁犀利，難怪苑仔用成過千萬，所以就要接廣告、出show幫補下。而她亦對外透露下年4月會再返TVB拍劇：「我將喺大陸賺嘅用晒，喺TVB賺嘅錢都用埋，所以我要喺TVB入面攞返晒！」她將會與鄭則士及張兆輝合作拍喜劇，劇本也是為她度身訂造，是否會以「石榴姐」造型示人？「石榴姐就唔會喇，我做返我自己，我係做大家姐！呢排都開始寫嘢，諗下啲金句，希望吸引到啲觀眾再次留意返香港嘅電視喇。」
亞視1月就會復活，有不少藝人都獲邀加盟亞視，原來苑仔都有份，她說：「有簽咗亞視嘅朋友搵我，問我可唔可以去電視台拍節目，我就問咩電視台？佢哋話係亞視。」苑仔當堂聽到都吃了一驚：「但已應承返TVB，亞視復活嘅事，咁就做唔到囉，我已經嫁咗，嫁咗就唔可以再嫁多次㗎嘛，唔能夠食兩家茶禮嘅。」而ViuTV都有搵苑仔做Talk Show，不過又係畀苑仔推咗：「我簽咗1年，4月之後就真係TVB人，咁就趁4月之前陸陸續續喺唔同地方出現囉。」