星爺《唐伯虎點秋香》日文版燒雞翼歌勁順耳　網民話似睇緊動漫

星爺周星馳的電影深受觀眾喜愛，有好多套星爺的喜劇不止是香港電影的神級代表作，更加揚名亞洲，被翻譯成多個不同語言的版本，日本甚至有日文配音版。近日網上就流傳了一段星爺電影《唐伯虎點秋香》的日文配音短片，內容是超經典又爆笑的一幕：燒雞翼！當然仲有那首係人都識唱的燒雞翼歌啦。由日本聲優配音一樣咁好笑，不少網民都話好似睇緊動漫。

大家一齊重溫下呢首由星爺、朱咪咪同師爺三個一齊合唱的雞翼歌歌詞：「燒雞翼我鍾意食，但係你老母講你就快釘，愈係快釘之所以愈要整多隻，如果而家唔食以後冇機會再食，你真係就快釘，我真係就快釘，如果而家唔食以後冇機會再食。」戲中三名日本負責配音的聲優用日文唱呢首歌都唱得好神似原版，就算唔識聽日文，都聽得出是好啱音，好順耳。

原來聲演唐伯虎的是著名聲優平田廣明，這位資深的聲優代表作包括動畫《ONE PIECE》中的山治，而日文版的星爺電影除了《唐伯虎點秋香》，他還聲演過《國產凌凌漆》、《九品芝麻官》、《賭俠》、《逃學威龍》以及《整蠱專家》中星爺所演的角色，亦是Johnny Depp的電影日文版御用聲優。