周杰倫愛女遺傳音樂細胞 2歲識講爸爸口頭蟬
撰文：洪曉璇
出版：更新：
做父母最希望小朋友健康長大，雖然湊小朋友好辛苦，但聽到BB識開口叫「爸爸、媽媽」一刻，真係乜都抵番晒。周杰倫同昆凌結婚3年幾，兩年內生咗兩個仔女，小周周Hathaway以及5個月大囝囝Romeo，不時於網上分享BB生活照，但一直無俾佢地正面樣貌曝光，呢日周杰倫終於破戒俾愛女現身IG，金髮BB好可愛呀﹗
不難發現婚前愛耍帥耍酷嘅周董，做咗爸爸之後儼如返老還童一樣，不時少女心大爆發，會同囡囡著父女裝出遊，見到可愛嘅小朋友又會影低分享，之前仲令網友誤以為嗰個BB就係小周周添～真正嘅小周周呢日正式喺IG曝光，周董上載一段短片並留言話：「有其父必有其女，你的律動真有喜感，只好分享給大家了... 以後長大別罵我喔。」雖然片段中KEY上CAP帽以及太陽眼鏡，單係睇鼻及嘴輪廓以及一頭金髮，相信同媽媽昆凌一樣都係美人兒。
片段中身穿黑色T-shirt嘅小周周，隨著周董歌曲《土耳其冰淇淋》旋律搖頭晃腦，節奏感相當強勁，仲兩次講出爸爸周董口頭禪：「唉唷不錯哦！」2歲小朋友口齒如斯清晰，令粉絲相當驚喜。小周周邊擺動身體仲不時加上手勢，就好似小小HIPHOP歌手一樣。其實小周周嘅音樂天份已經唔係第一次展現人前，昆凌曾經上載一段攜女欣賞爸爸個唱嘅短片，小周周拎住螢光棒隨住節奏擺動非常可愛；仲有一段喺小周周4個月大時彈玩具鋼琴嘅片段，看似有板有眼，周董其後更根據呢幾個單音創作出《前世情人》，令人驚艷。周董曾經講過唔反對囡囡入行，如果將來有機會父女檔合作一定大有看頭。